Pơhiăp ƀơi mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn hơmâo lăi pơthâo boh tơhnal jơnum lok 7, khua mua pơ ala mơnuih ƀôn sang dêh čar tal XV, tui hăng anun hơdôm kơčăo bruă tơlơi phiăn, hră pơtrun dưi hơmâo ƀing pơ ala mơnuih ƀôn sang dêh čar sem glăi, pơsit hĭ hơdôm mơta bruă pơdjơ̆ nao lu anom bruă, amăng kual mơnuih ruah khua đing nao, mơnuih ƀôn sang amăng dêh čar ta krăo lăng. Ơi Trần Thanh Mẫn brơi thâo, lơ 1/7 mơtam, 10 mơta tơlơi phiăn dưi ngă tui; hơdôm tơlơi phiăn dưi ngă tui anun khom hơmâo hră pơtrun tŏ tui pơtô brơi hơdră či ngă tui tum teč hloh.

Lu anih lĕ mơnuih mă bruă dŏ pơjang nao rai pơsir hră pơar ană plơi, ngă kơ hră pơtrun, hră pơčrâo, ngă tui kaih hĭ, hơdôm bruă mă pơtrut bơwih ƀong huă kiăng hruaih ƀiă lĕ, ngă gun hĭ mơn ăt tơbiă mơ̆ng khua mua amăng tơring čar plơi pla soh. Khua pơ ala mơnuih ƀôn sang dêh čar pơtrun hiăp brơi ngă kơtang pran jua mă bruă hăng tơlơi tơpă, djơ̆ mông, ngă tui djơ̆ tơlơi phiăn pơkă, git gai, pơčrâo ba kiăng hơmâo pran jua pơtrut hmar hloh amăng bruă mă, khin pơmin, khin ngă, kiăng pơgang boh tŭ yua hrŏm kơ abih bang.