Pơ ala brơi Khua dêh čar pơđok hră mơ-it nao, Khua ding jum kơčăo bruă hăng tuh pơ alin Nguyễn Chí Dũng brơi thâo, bruă pơjing pơhrua sa, dua hơdră bruă yôm phara kiăng ngă tui tơlơi pơtrun mrô 39 mơng Ding jum kơđi čar, ngă tui djop tơlơi dưi, tơlơi gal amăng pơđĭ kyar tơring čar Nghệ An tañ hăng hơđong kjăp, anai lĕ anih phun amăng kual Kơdư tong krah sĭ mơdrô, logistics, ia jrao, pơtô pơjuăt, boh thâo ia rơgơi, tuh tia pơkra ming hăng ngă hmua mă yua boh thâo phrâo. Kơtưn kah gưl, jao bruă, pơhlôm ngă pô, gơgrong mơng gong gai tơring čar Nghệ An, laih dong pơhlôm bruă pel ĕp, krăo lăng mơng Ƀirô Khua pơ ala mơnuih ƀôn sang dêh čar, Kơnuk kơna, Khul pơ ala mơnuih ƀôn sang djop gưl amăng tơring čar Nghệ An.

Lăi pơthâo bruă sem lăng črăn tơlơi pơtrun, Khua Jơnum min prăk kak, ngăn drăp mơng Ƀirô Khua pơ ala mơnuih ƀôn sang dêh čar ơi Lê Quang Mạnh brơi thâo, bruă kơnuk kơna mơ-it Ƀirô Khua pơ ala mơnuih ƀôn sang dêh čar sem lăng, pơsit hăng črăn tơlơi pơtrun mơng Ƀirô Khua pơ ala mơnuih ƀôn sang dêh čar kơ bruă ngă tui sa, dua hơdră yôm phara pơđĭ kyar tơring čar Nghệ An lĕ hluai tui bruă kơđi čar, djơ̆ tơlơi phiăn hăng tui tơlơi glăm ba. Ăt amăng mơguah lơ 31/5, Khua pơ ala mơnuih ƀôn sang dêh čar hmư̆ hră lăi pơthâo hăng hră sem lăng črăn tơlơi pơtrun pơplih pơkra, pơhrua tơlơi pơtrun mơng Khua pơ ala mơnuih ƀôn sang dêh čar kơ bruă ngă tui hơdră gong gai plơi prong, hơdră yôm phara pơđĭ kyar ƀôn prong Đà Nẵng.