Ƀơi Sang ia jrao să Tŭ Mrông, tơring glông Tŭ Mrông, tơring čar Kon Tum, mơnuih duam ruă hơpă hmâo tơlơi hơget thơ amăng drơi jăn rai pơ̆ anai leng kơ kiăng nai ia jrao Hà pel ĕp brơi. Amai Y Hà pơblang, 26 thun mă bruă ƀơi Sang ia jrao să Đăk Hà, laih anun Sang ia jrao să Tŭ Mrông, tơring glông Tŭ Mrông ñu jing juăt laih hăng rim mơnuih duam ruă, laih anun ñu lĕ mơnuih djuai ania Hơdang tơkeng rai ƀơi kual lŏn anai, mơnuih ƀôn sang wot dua bôh să abih bang kah hăng neh wa djuai ania Hơdang soh anun thâo hluh bôh pơhiăp, phiăn juăt amuñ rôk ruai hloh. Hơduah ĕp mơ̆ng gong gai, mơnuih ƀôn sang hăng ƀing mă bruă ƀơi Sang ia jrao brơi thâo, tơlơi gum hơgôp prong hloh mơ̆ng Khua Sang ia jrao să Y Hà rơgao 26 thun mă bruă lĕ hmâo ba laih ƀing adơi amai djuai ania Hơdang nao tơkeng ană ƀơi hơdôm bôh anih anom ia jrao lŏm lui bruă tơkeng ană ƀơi sang. Hăng amai Y Hà, yâo mơ-ak prong hloh lĕ dưi lăng ƀuh bruă bơwih brơi tơlơi suaih pral mơ̆ng neh wa djuai ania Hơdang jai hrơi jai klă hloh:

“Hlâo adih tơlơi pơplih mơ̆ng tơlơi ruă glêh tơnap biă, lu biă samơ̆ truh ră anai bruă bơwih brơi tơlơi suaih pral hmâo nao truh rim sang anô̆, rim plơi. Kâo dô̆ pơ̆ anai lĕ ƀu dô̆ hmâo tơlơi ruă duam pơgrun dong tah, plai ƀiă tơlơi ruă duam pơđung drah, tơlơi ruă djơ̆ drăng hơdôm tơlơi ruă lar tưp hyu. Amăng bruă pơgang pơgăn klin dưi hrŏ trun lu biă hăng rơđah rơđông dong. Čang rơmang abih bang neh wa amăng să đing nao bơwih brơi tơlơi suaih pral kơ drơi pô".

Amăng 26 thun mă bruă, abih pran jua hăng bruă ia jrao kual tơnap tap Tŭ Mrông, hăng mơnuih duam ruă djuai ania Hơdang, amai Y Hà hmâo yak rơgao lu tơlơi tơnap pioh kiăo tui jơlan pô hrăm hăng jing anih kơnang djru gum neh wa kual čư̆ siăng ngă juăt hăng bruă bơwih brơi tơlơi suaih pral klă hloh. Mă rah bruă hrăm rah, thun 2017 ñu hrăm giong tal hrăm bơwih brơi kơ đah kơmơi ƀă ană. Hăng bruă ngă Khua Sang ia jrao să Tŭ Mrông, hrŏm hăng git gai bruă mă ƀơi sang ia jrao, amai Y Hà ăt na nao mơn nao pơ̆ 8 bôh plơi amăng să kiăng thâo tơlơi pơplih klin ruă, bưp hăng lăi pơthâo kơ mơnuih ƀôn sang đing nao bơwih brơi tơlơi suaih pral. Lơm mă bruă ñu hăng ƀing ơi, nai ia jrao mơ̆ng sang ia jrao hmâo lu wot pơtlaih hơdip kơ đah kơmơi hăng ană nge. Pran jua hur har hăng bruă ia jrao kual tơnap tap hăng mơnuih djuai ania Hơdang duam ruă mơ̆ng ñu dưi hmâo ƀing gŏp pơsit yôm biă. Amai Phan Thị Thanh Vân, mơnuih mă bruă amăng Sang ia jrao să Đăk Hà brơi thâo:

“Amai Y Hà lĕ sa čô mơnuih hur har pran jua amăng bruă mă. Ƀơi sang ia jrao rim hrơi ñu črâo ba mơnuih mă bruă amăng sang ia jrao mă bruă kiăng ngă tui hơdôm tơhnal ba tơbiă. Amăng hơdôm bruă mă ñu gum hrŏm ƀing adơi ayong adơi amai nao pơ̆ plơi kiăng lăi pơhing hyu hăng bơwih brơi tơdơi kơ tơkeng ană laih anun klâ̆o jrao pơgang hlôm hlâo tơlơi ruă gah rơngiao kơ sang ia jrao. Ñu đing nao djru ba adơi ayong amăng sang ia jrao”.

Bơ̆ ơi ia jrao Nguyễn Thành Thảo, Kơ-iăng Khua Anom ia jrao tơring glông Tŭ Mrông lĕ pơsit:

“Y Hà hur har biă amăng bruă bơwih brơi tơlơi suaih pral kơ mơnuih ƀôn sang amăng să. Hăng pran jua hur har Y Hà lăng ba biă neh wa ƀơi anai hăng Y Hà hmâo pran jua hrưn đĭ amăng bruă mă hrăm tui bôh thâo. Y Hà lĕ sa gru ba jơlan hlâo ƀuh rơđah hloh mơ̆ng sang ia jrao”.

Hmâo 26 thun mă bruă, abih pran jua pô hăng bruă bơwih brơi tơlơi suaih pral mơnuih ƀôn sang, amai Y Hà, Khua Sang ia jrao să Tŭ Mrông, tơring glông Tŭ Mrông, tơring čar Kon Tum lĕ anih kơnang kơjăp kơ neh wa djuai ania Hơdang ƀơi anai. Pran jua tuh rơyuh, pran jua gơgrong hăng pran jua khăp kơ bruă mơ̆ng ñu glăk djru pơplih dong tơlơi pơmin, djru mơnuih ƀôn sang ƀơi kual lŏn dô̆ lu tơlơi tơnap anai dưi tŭ mă hăng bơwih brơi bruă ia jrao klă hloh. Mơ̆ng anun, ƀing ta mưn ƀuh pran jua tuh rơyuh, abih pran jua hăng hur har mă bruă mơ̆ng mơnuih apăn bruă, mơnuih mă bruă ia jrao ƀơi kual asuek, kual ataih. Hrŏm hăng anun pơdah pran jua gum hrŏm hơbit, tơlơi ha pran jua mơ̆ng mơnuih apăn bruă ia jrao hăng mơnuih ƀôn sang ƀơi anai. Ƀing ta ăt lăng ƀuh mơn pran ư-ang mơ̆ng djuai ania Hơdang ƀơi anai lơm hmâo mơnuih apăn bruă ia jrao rơgơi mơ̆ng amai Y Hà, djru pơplih tơlơi pơmin, pok prong tơhnal gal ngă juăt hăng bruă ia jrao kơ neh wa./.