Tlam kơnôl 26/8, ƀơi tơring čar Cao Bằng, grup khua mua Ping gah, kơnuk kơna hăng Ding jum ling tơhan yua khua tơhan krên dên ơi Phan Văn Giang, Ding kơna Ding jum kơđi čar, kơ-iăng Khua dêh čar, Khua ding jum ling tơhan ba jơlan hlâo nao jơnum hrŏm hăng jao miđai 80 thun mut Ping gah ƀrô kơnôl 2/9/2026 brơi mơnuih Ping gah Nguyễn Khánh Trung, mơnuih dŏ hơdip ƀơi Khul Ping gah ƀut plơi pla Hoàng Tung, phương Thục Phán. Đĭ pơhiăp amăng mông jao miđai, khua tơhan krên dên ơi Phan Văn Giang pơpŭ kơ ơi Nguyễn Khánh Trung lơm dưi tŭ mă miđai 80 thun mut Ping gah, anai lĕ tơlơi pơpŭ prong hloh kiăng tŭ yap pran pơhrăm pô, tuh rơyuh pran jua brơi bruă ngă hơkrŭ mơng Ping gah.

Anai ăt lĕ tơlơi pơ-ư ang mơng sang anŏ, plơi pla hăng Ping gah tơring čar Cao Bằng. Khua tơhan krên dên ơi Phan Văn Giang lăi pơtong, găn rơgao lu anih anom mă bruă, ơi Nguyễn Khánh Trung lêng kjăp ngă bruă kơđi čar, akĕ phĭ tui Ping gah, dêh čar hăng mơnuih ƀôn sang; lêng kơ ba gru, hơdip jê̆ giăm mơnuih ƀôn sang. Lơm pơdơi mă bruă, ñu tŏ tui djă pioh gru hơdip hiam, gir run gum hrŏm ngă bruă amăng ƀon lan, jing anih gơnang nao mơng sang anŏ hăng mơnuih ƀôn sang.