Mơguah lơ 23/3, ƀơi Hà Nội, Khul anom bruă mơdrô anet hăng man ƀrô Việt Nam jơnum ruah khua Khul đơ đam dêh čar tal IV rơwang bruă thun 2023-2028. Ding kơna khul git gai ping gah dêh čar, kơ-iăng khua dêh čar ơi Lê Minh Khái nao jơnum hrom hăng git gai jơnum. Giăm hơmâo 64 rơbâo čô mơnuih ngă ding kơna rơwang bruă rơgao Khul anom bruă sĭ mơdrô anet hăng man ƀrô hơmâo ngă klă tơlơi gơgrong, glăm ba, bruă mă mơ̆ng Khul apăn bruă rơwang bruă thun 2018-2023.

Khul hơmâo pơđĭ kyar hmar mrô mơnuih mut phung hăng hơdră akŏ pơdong anom bruă, boh tŭ yua amăng bruă mă. Lăi nao kơ bruă mă pơ anăp adih, Kơ-iăng Khua dêh čar ơi Lê Minh Khái rơkâo, Khul anom bruă sĭ mơdrô anet hăng man ƀrô Việt Nam ăt pơđĭ hloh bruă mă djă gru hiam, ĕp hơdră pơsir mă amăng bruă git gai ngă tui djơ̆ tơlơi pơtrun mơ̆ng kơnuk kơna, gum hrom kơnuk kơna, djop ding jum anom bruă, tơring čar hơmâo djru ba kơ djop anom bruă sĭ mơdrô anet hăng man ƀrô dŏ lu tơlơi tơnap tap, pơtrut rŭ glăi tơlơi bơwih ƀong huă hăng pơđĭ kyar.