Ăt amăng rơwang hrơi tơjuh anai mơ̆n, Anom bruă Khul tơdăm dra rơnuk HCM hăng Phun kông ty sang dăng kông Việt Nam hơmâo kĭ pơkôl bruă ngă hrom djru pơblih yua mrô brơi kơ ƀing tơdăm dra mut phung, hlăk ai. Ƀơi mông mă bruă hăng Khua mua git gai anom bruă Khl tơdăm dra rơnuk HCM dêh čar, ơi Vương Đình Huệ, Khua git gai pơ ala mơnuih ƀôn sang dêh čar lăng yôm bruă Anom bruă gah tơdăm dra mut phung dêh čar ruah mă anăn hăng jơlan hơdră mă bruă thun 2023 hăng akŏ bruă Blan pioh kơ hlăk ai lir hơbit hăng bruă “Pơblih yua mrô”.

Anai yơh bruă mă yôm, ječ ameč mơ̆n, kiăng ngă djơ̆ lăp bruă mă phrâo hrom hăng abih bang, ba dêh čar ta mut phung prong hloh hăng anŏ pơđĭ kyar hrom ƀơi rŏng lŏn tơnah. Kơ bruă mă gah hlăk ai tơdăm dra mut phung hăng bruă mă wai lăng phung tơdăm ngek dra muai pơ anăp, Khua git gai pơ ala mơnuih ƀôn sang dêh čar rơkâo, Anom bruă Khul tơdăm dra rơnuk HCM gơnong dlông ăt kơsem min lăng, pơtô lăi tong ten hloh hơdôm tơlơi pơhiăp git gai mơ̆ng Khua git gai ping gah dêh čar ơi Nguyễn Phú Trọng lăi nao amăng mông jơnum ruah khua tơdăm dra rơnuk HCM dêh čar tal XII; ngă rơđah hloh boh yôm phun amăng bruă mă hơmâo jao, pơtrun ngă. Khua git gai pơ ala mơnuih ƀôn sang dêh čar ơi Vương Đình Huệ rơkâo:

“Anom bruă Khul tơdăm dra rơnuk HCM kiăng thâo hluh dơlăm hloh tơlơi glăm ba, gơgrong phun hăng bưng bôt mơ̆ng ta pô, pơđĭ tui tơlơi pơmin thâo hluh prong bruă glăm ba, ƀu pơdơi ôh gir run, kơtưn hrăm, ƀư̆ pơkra pran jua, ai hơtai tơlơi thâo rơgơi, pran jua hiam klă tui bruă hơkrŭ, pơtrut tơlơi kiăng prong amăng hlăk ai ngă tui bưng bôt gru phun dêh čar, ba jơlan hlâo amăng bruă akŏ pơdong hăng pơgang Lŏn ia. Pơđĭ tui bruă pơtô hrăm tơdăm dra čơđai muai rơnuk anai thâo hluh jơlan phun bruă hơkrŭ, pran jua hiam, tơlơi dŏ dong ƀong huă tơpă, rơguăt hiam, pơtrut pran jua thâo khăp lŏn ia, pơ-ư ang kơ djuai ania, biă mă ñu djă pioh tơlơi kiăng pơmin prong či ngă pơ anăp adih, anŏ kiăng djru hrom akŏ pơdong lŏn ia pơdrong asah, hyuk hyak mơak klă hăng tơlơi thâo tong ten bưng bôt khom ngă, tơlơi glăm ba mơ̆ng pô amăng bruă akŏ pơdong hăng pơgang Lŏn ia”.

Hrom hăng pơđĭ kyar mơ̆ng bruă hơkrŭ ngă tui boh thâo ia rơgơi 4.0, tơlơi pơhing bơwih ƀong huă, kơđi čar, mơnuih mơnam, hlăk ai hlăk pơblih kiăo tui hmar biă mă. Khua git gai pơ ala mơnuih ƀôn sang dêh čar, ơi Vương Đình Huệ, rơkâo Khul tơdăm dra mut phung khom thâo pơčeh phrâo, ƀu pơdơi ôh pơblih phrâo boh yôm phun, hơdră mă bruă pơsir hơdôm tơlơi či kiăng, anŏ čang rơmang mơ̆ng hlăk ai, mă hlăk ai yơh ngă anŏ phun pioh pơčeh phrâo bruă mă, pơphun brơi bruă mă khom yua kơ boh tŭ yua lăp djơ̆ mơ̆ng hlăk ai. Anom bruă Khul tơdăm dra mut phung khom jing ƀing  kơsung nao hlâo ngă tui jơlan hơdră pơblih yua mrô gưl dêh čar; pơđĭ kyar bơwih ƀong huă tui mrô amăng atur kơ boh thâo ia rơgơi hăng tơlơi kơhnâo, pơblih pơčeh phrâo ia rơgơi kơhnâo.

Ăt amăng rơwang hrơi kom anai mơ̆n, Anom bruă Tơdăm dra rơnuk HCM hăng Phun kông ty sang dăng kông Việt Nam (Vietnam Post) jơnum kĭ pơkôl ngă hrom mơ̆ng thun 2023-2026 hăng boh yôm phun pơtum nao kơ bruă mă djru pơblih yua mrô brơi kơ tơdăm dra hlăk ai mut phung. Pơhiăp ƀơi mông jơnum kĭ pơkôl, ayong Buì Quang Huy, Khua tal sa Anom bruă tơdăm dra mut phung dêh čar brơi thâo, Anom bruă tơdăm dra mut phung gơnong dlông pơtong laih, khul hlăk ai tơdăm dra yơh khom ngă hlâo, lơ̆m kiăo tui pơblih yua mrô.

Yua kơ anun, bruă kĭ pơkôl ngă hrom anai amra djru hrom pơtrut bruă mă pơtô hrăm pơblih yua mrô kơ tơdăm dra hlăk ai mut phung:

“Ƀing gơmơi kĭ pơkôl hrơi anai lĕ kĭ pơkôl ƀơi 3 gưl, gưl gơnong dlông, gưl tơring čar, gưl tơring glông. Tơlơi anai ngă kơ boh yôm phun hră pơkôl dua bơnah amra tañ hloh dưi ngă tui sit nik laih kĭ giong. Tơdơi kơ hơdră anai, gơmơi čang rơmang dua bơnah amra pok pơhai tum teč hloh boh yôm phun hơmâo kĭ hăng dưi jŭ yap boh tơhnal boh yôm phun amăng bruă mă rĭm blan, tơlơi anun djru ƀing ta pơđĭ tui boh tŭ yua amăng bruă ngă hrom dua bơnah”.

Tui hăng tơlơi kĭ pơkôl ngă hrom, mơ̆ng thun 2023-2026, dua bơnah pơtum ngă hrom pok pơhai bruă mă pơblih yua mrô kơ tơdăm dra mut phung, khul hlăk ai thâo hơdră sĭ mơdrô bơwih ƀong huă tui atur yua mrô, biă mă ñu hlăk ai dŏ amăng kual plơi pla. Ơi Nguyễn Hải Thanh Khua Khul ding kơna git gai Phun kông ty Sang dăng kông Việt Nam brơi thâo:

“Sang dăng kông Việt Nam ăt ngă hrom Khul tơdăm dra rơnuk HCM amăng bruă mă djru bơwih ƀong huă kơ mơnuih mơnam dêh čar, bruă mă djru ană plơi pla kah hăng djru soh sel, pơtrun nua prăk apah pơdŭ pơgiăng, rơnoh prăk apah kơ gơnam pơkra ming phrâo akŏ pơjing bruă mă mơ̆ng khul hlăk ai plơi pla; ngă hrom djop sang bruă hlăk ai mut phung, ring bruă hlăk ai gưl dêh čar, djru pơsir tơlơi rin rơpa, juâ̆t lăi, lui rơmŏn kŏn rin kơ mơnuih ƀôn sang hơđong kjăp....pơgôp hrom amăng hơdră dêh čar pơtrun brơi man pơdong plơi pla phrâo, man pơdong plơi prong rơgơi kơhnâo”.

Lơ̆m pok pơhai ngă tui tơlơi pơkôl Vietnam Post ngă hrom Anom bruă Khul tơdăm dra rơnuk HCM amra pơtô hrăm kơ hlăk ai, tơdăm dra amăng dêh čar thâo tong ten kơ bruă pơblih yua mrô, laih dơ̆ng pơtô brơi tơlơi thâo hơdră mă yua sit nik amăng bruă sĭ mơdrô pơdah thâo amăng atur yua mrô: mă yua anŏ phrâo pơdah thâo sĭ mơdrô lơ̆m plang tơlơi pơhing internet kơ bruă marketing phrâo, hơdră livestream sĭ mơdrô gơnam tam, pơkra ming dăp hơdră pơdah rup, lăi pơthâo gơnam tam marketing djơ̆ lăp, wai lăng hăng pơgang ba tuai blơi gơnam ta sĭ mơdrô,....Vietnam Post amra kơ tơdăm dra hlăk ai mut phung amăng dêh čar dưi pok pơdă gơnam sĭ mơdrô, pôr pơthâo hăng plăng điện tử Postmart.vn.