Khul tơhan 3 hơmâo akŏ pơdong amăng lơ 26/3/1975, pơƀut abih khul grup tơhan ƀơi Kual Dap Kơdư jing Khul tơhan phun blah hơdeč rŭi hyu. Khul tơhan 3 pơƀuh tơlơi gơgrong bruă jing anom bruă phun, djru prong biă amăng tal blah rơngai kual Dap Kơdư, anăp nao pơklaih rơngai abih bang kual Dơnung, pơlir hơbit lŏn ia amăng lơ 30/4/1975. Amăng bruă akŏ pơdong, pơgang lŏn ia, Khul tơhan 3 ngă bruă pơlir hơbit, jê̆ giăm hăng ping gah, gong gai wơ̆t hăng mơnuih ƀôn sang djŏp djuai ania ƀơi anih gơñu pơdong puih kơđông; gum pơgôp prong amăng bruă bơwih ƀong huă, rơnuk rơnua lŏn ia mơ̆ng tơring čar Gia Lai lăi hơjăn, hơdôm boh tơring čar kual Dap Kơdư lăi hrŏm.

Hăng hơdôm bruă hơmâo ngă truh kih amăng rơnuk blah wang wơ̆t hăng amăng hrơi blan akŏ pơdong pơgang lŏn ia, Khul tơhan 3 pơ-ư pơ-ang hơmâo Ping gah hăng Kơnuk kơna brơi Miđai Tơhan sông kơtang blah ngă amăng lơ 20/12/1979; 81 khul grup hăng 47 čô tơhan hơmâo Ping gah, Kơnuk kơna pơpŭ bơni brơi Hră bơni tơhan blah ngă sông kơtang. Amăng anun hơmâo 9 grup hơmâo mă Hră bơni Tơhan sông kơtang tal 2; Lữ đoàn CB7 hăng Trung đoàn BB66 hơmâo pơpŭ mă Hră bơni Tơhan sông kơtang tal 3 amăng rơnuk pơplih phrâo.