Hơdôm tơlơi pơgôp hiăp hăng bơkơtuai ƀơi mông jơnum pơƀut ngă rơđah boh than hơmâo ngă laih anun hơdôm tơlơi ba tơbiă kiăng ngă amăng 10 thun pok pơhai ngă tui Tơlơi pơtrun jơnum lok 8, Ping gah dêh čar tal 11 kơ Hơdră pơgang Lŏn ia amăng mông anai ƀơi Khul tơhan 7. Trung tướng Trần Hoài Trung, Khua apăn bruă Ping gah, Khua git gai ping gah Khul tơhan brơi thâo, Khul tơhan 7 jing anih yôm phun mơng kual Dơnung wơ̆t hăng amăng đơ đam dêh čar. Ping gah, Anom bruă git gai tơhan Khul tơhan mrô 7 pơsit hơmâo 3 mơta tơlơi bơngơ̆t kiăng ngă: Kiăng akŏ pơdong tơhan pơgang lŏn ia hơmâo abih bang mơnuih gum ngă, kual pơgang lŏn ia; wai lăng ba ană plơi hăng djru brơi dêh čar Kur.

Khul tơhan hơmâo pơphun ngă tŭ yua bruă pơgang guai dêh čar hăng lu bruă ngă pơčeh phrâo, tŭ yua. Ƀing khua hơmâo rơkâo hăng Ping gah kơnuk kơna ta kơsem min, hơmâo tơlơi pơtrun phrâo kơ hơdră pơgang ba Lŏn ia djơ̆ hăng bruă pơgang ba Lŏn ia amăng mông anai.