Amăng mông adai rơ-ot či mơguah bơyan phang kual Dap Kơdư, ƀơi tơdron hrăm blah ngă gah anom bruă Khul ling tơhan pơtô hrăm blah ngă Anom bruă tơhan pơgang guai dêh čar tơring čar Dak Lak či să giăm guai dêh čar Krông Na, tơring glông Ƀuôn Đôn, hơdôm hơpluh čô tơhan phrâo mut hlăk kih rơmet, duñ djah djâo, hla kyâo asuk ruk, glăm pơđuăi hnua kyâo, pioh pơdong war pơga, ngă anŏ pơđam hrăm pơnah; amăng sang jơnum lĕ, lu tơhan phrâo mut hmư̆ tơlơi pơtô kơ bruă kơđi čar, boh yôm phun tơlơi phiăn pơkă kơ ling tơhan hăng sem glăi tơlơi suaih pral drơi jăn djop pô tơhan phrâo mut. Tơhan phrâo mut thun tal sa, Lê Thành Huy 18 thun, mơ̆ng plơi prong Ƀuôn Ma Thuôt, phrâo mut tơhan akŏ thun 2024 đôč ñu lăi, hơdôm hrơi blung a mut tơhan, ăt sư̆ rơbư̆ mơ̆n, hning kơ sang anŏ, samơ̆ dưi hơmâo khua mua ping gah amăng puih kơđông djru ba, juh alum pơtrut pran jua, ră anai mơak laih, prăp rơmet kơ bruă či pơtop hrăm  blah ngă djơ̆ amăng bơyan hrăm blah ngă kơ long tơhan:

“Mut amăng tơhan hrăm blah ngă, kâo dưi hơmâo khua mua amăng puih kơđông khul ling tơhan mơ̆ng khua grup ƀiă mơnuih, truh kơ grup lu mơnuih juăt lăi, Tiểu đội, Trung đội trưởng pơtô brơi mơ̆ng bruă anet tơlơi dŏ dong ƀong huă, rơmet anih pit pơdơi pơdă, dưm gơnam lŏp sum ao abăn khăn, kih rơmet sang dŏ anŏ yua, rơmet abăn khăn, blĭ añuai, kiao ngă djơ̆ hơdră soh tui tơlơi pơtô kơ ling tơhan juăt ngă khom hơbôt hyôt, beč bal. Prăp lui tơlơi suaih pral pran jua mut hrăm blah ngă amăng bơyan phang adai pơđiă kơtang, hrăm hơdôm tơlơi phiăn pơtrun kơ ling tơhan kah hăng; Tơlơi pơtrun jak iâu ječ ameč pơtum tơhan, hrăm pơtaih, hrăm mơneč blah ngă, hrăm ruh, dăp, mă yua phao kơtuang, hrăm pơnah phao hơdôm tơlơi pơtrun mơ̆ng Tiểu đoàn pô pơkă”.

Tơhan phrâo mut thun tal sa Nguyễn Xuân Điền 24 thun, plơi pla mơ̆ng Ninh Diêm, plơi prong Ninh Hòa, tơring čar Khánh Hòa ăt mut tơhan akŏ thun anai mơ̆n arăng ba nao ngă tơhan amăng Tiểu đoàn pơtô hrăm blah ngă gah tơhan pơgang guai dêh čar tơring čar Dak Lak lăi, ama hăng ayong ñu ăt tom ngă tơhan soh. Ñu mơak hăng pơ-ư ang gru grua sang anŏ ngă tơhan, mah hlăk ngă bruă gah bruă ba tuai hyu ngui, prăk blan 10 klăk prăk sa blan, ñu ăt čih hră rơkâo mut ngă tơhan mơ̆n:

“Mut nao amăng bơyan hrăm blah ngă pơ anăp anai, kâo ăt prăp rơmet drơi jăn pran suaih pral kiăng ngă klă bruă jao hrăm čih amăng hră pơar tui hăng khua mua jao kơ ta khom ngă. Tơlơi čang rơmang mơ̆ng kâo lĕ gir run kiăng jing sa čô tơhan Wa Hồ, gir run pơyơr pran jua mă bruă sa črăn drơi jăn tơlơi suaih pral anet aneo mơ̆ng ta pô kiăng djru kơ lŏn ia plơi pla pô”.

Bơyan iâu pơmut tơhan thun 2024 anai, anom bruă Khul ling tơhan pơtô hrăm blah ngă mơ̆ng tơhan pơgang guai dêh čar tơring čar Dak Lak dưi jao bruă pơtô hrăm brơi 190 čô tơhan phrâo mut, amăng anun 70 čô tơhan ƀơi Dak Lak, 120 čô tơhan mơ̆ng tơring čar Khánh Hòa. Đại uý Lê Anh Vũ Niê Kdăm-Khua tơhan khul grup Tiểu đoàn brơi thâo, abih bang ling tơhan phrâo mut thun anai lăng ƀing gơñu lêng kơ găng añrăng soh, hrăm hră anih pơprong lu hloh pơkă hăng thun hlâo, yua kơ anun hrăm tañ thâo hơdôm mơta tơlơi čih pơtô amăng hră pơar laih anun pơhrăm tơhan klă hloh. Tiểu đoàn ăt hơmâo prăp lui tong ten hơdôm tơlơi gêh găl brơi kơ tal pơtop hrăm tơhan blah ngă phrâo pơ anăp anai.

“Hơdôm boh yôm phun pơtop hrăm blah ngă kah hăng Tơlơi pơtrun kơ tơhan ječ ameč, mơneč kơsung blah tơhan blah ngă ƀơi lŏn, boh yôm phun 3 mơta jua pơtuh kah hăng phao Ak-71, glom boh garnat 71, boh pơtuh 71…hơdôm mơta tơlơi hrăm anai anom bruă hơmâo prăp rơmet giong laih. Gơmơi pơpha bruă mă, jao kơ rim čô čih dăp hră pơtô hrăm, ngă tui hơdră pơtop hrăm sit nik bơwih brơi klă bruă pơtô hrăm mơ̆ng anih hrăm truh pơ nao pơrơngiao. Rơngiao kơ anun, bruă mă prăp lui gơnam yua anih hrăm, anih rŭi hyu bôn, rui, hrăm blah prăp lui djop laih”.

Jơlan găn rơgao 47 thun akŏ pơjing hăng pơđĭ kyar, Tiểu đoàn pơtô hrăm blah ngă mơ̆ng anom bruă tơhan pơgang guai dêh čar tơring čar Dak Lak hơmâo pơtô hrăm brơi 72 wơ̆t, jao brơi tơhan pơgang guai dêh čar djop tơring čar Dak Lak, Gia Lai, Kon Tum, Dak Nông, Khánh Hòa, Bình Định hăng Quảng Ngãi, kiăng ngă tui bruă wai pơgang lŏn ia. Hrŏm hăng anun, hơdôm rơbâo čô tơhan tơguan djru bruă jing tơhan prăp lui ƀơi djop plơi pla ăt hrăm blah ngă mơ̆n, kiăng wai pơgang lŏn ia dêh čar.

Tui hăng thiếu tá, Phạm Kiều Hưng, Kơ-iăng Khua tiểu đoàn, djă pioh hăng ngă tui gru grua hiam mơ̆ng anom bruă, bơyan pơtô hrăm tơhan blah ngă thun 2024 anai, kiăng djru kơ ƀing tơhan phrâo mut tañ mut hrŏm mơak, hur har pơplông nao rai hrăm hăng pơtop rơjang drơi jăn, Ping gah, khua mua tiểu đoàn hơmâo čih ngă hră pơtrun sa akŏ bruă, akŏ pơjing hăng čih dăp lu akŏ bruă, tŭ jum, pơtô hrăm ƀing tơhan phrâo, kiăng ngă djơ̆ anŏ kiăng “Bruă mă phun, lăp djơ̆, hơđong kjăp”. Thiếu tá Phạm Kiều Hưng lăi:

“Tui hăng bruă jao pơpha mơ̆ng khua tơhan pơgang guai dêh čar tơring čar Dak Lak, mơ̆ng hnang blung mơtam ping gah, khua mua tiểu đoàn hơmâo pơtong anai lĕ bruă mă yôm phara hăng pơphun brơi jŭ yap glăi djop tơhnal bruă prăp lui mơ̆ng tơlơi pơmin pơtô hrăm mơ̆ng ping gah, anom bruă truh pơ gơnam yua djă mă bruă, anih dŏ anŏ ƀong, pơdơi pơdă jing bruă mă rông tơhan pô prăp lui hăng anih či hrăm blah ngă pơnah phao biă prăp lui klă soh kiăng tơhan phrâo mut hrăm hơmâo boh tŭ yua hiam”.

Adai pơđiă kơtang bơyan phang ƀơi Dak Lak, bơyan bơnga čuh, hla luh laih čuh čơnăt mơda hla phrâo bluh amăng djop anih glai klô, lŏn tơdron, ăt jing bơyan phang adai pơđiă kơtang hang akŏ. Ƀing tơhan phrâo mut mơ̆ng tiểu đoàn hrăm blah ngă gah anom bruă tơhan pơgang guai dêh čar tơring čar Dak Lak amra găn rơgao amăng hrơi blan, mông tơnap tap hloh kah hăng dŏ amăng dơnao apui rui hyu hrăm djă phao blah ngă. Samơ̆ hăng pran jua glăm ba, tơlơi hur har mơ̆ng hlăk ai pran jua kơtang mă bruă, ai hơtai hlăk bluh amra dưi găn rơgao hĭ mơ̆n tơlơi lông lăng, kiăng pơjing rai pran jua sa čô tơhan dưi pơgang ba tong ten guai dêh čar, anăp nao ngă giong bruă jao, pơgang lŏn ia tơlơi rơnuk rơnua dêh čar lăp hăng anŏ kơnang mơ̆ng mơnuih ƀôn sang.