Čih anăn ruah hlâo khul apăn bruă ding kơna ping gah tơring čar Dak Lak rơwang bruă thun 2025-2030 hơmâo 122 čô, khul apăn bruă phun ping gah tơring čar lĕ hơmâo 38 čô. Mrô mơnuih apăn bruă khin hơtai, thâo rơgơi biă mă, tŏ tui glăm ba bruă mă dưi apăn bruă hăng pơđĭ kyar tui hluai hnơr rơnuk tŏ tui djơ̆ lăp. Lu mơnuih dưi pơtô hrăm, pơblih anih mă bruă, dưm dăp lui hlâo kiăng tañ thâo, kơjăp amăng bruă mă pơsir tơlơi hơmâo sit nik. Samơ̆ bruă ruah ĕp mơnuih ngă khua ƀu kơnong ngă ruah djop mrô đôč ôh. Tơlơi yom kiăng đing nao hloh lĕ ruah djơ̆ mơnuih hăng ngă gêh găl pioh kơ mơnuih apăn bruă dưi thâo hăng kơjăp ngă bruă.

Ƀuh rơđah ƀing apăn bruă thun hlăk ai, boh nik ñu amăng bruă ruah lui hlâo mơnuih apăn bruă ping gah tơring čar, dŏ tơdu; mrô mơnuih apăn bruă jing đah kơmơi ngă khua aka ƀu lu ôh. Tơlơi thâo bong djơ̆, kơjăp tong ten amăng bruă mă phrâo ăt aka ƀu bơkơnar ôh. Lu khua mua dŏ sư̆ rơbư̆ lơ̆m pơblih jao amăng bruă tơnap kah hăng prăk kăk, lơ̆n mơnai, man pơdong. Amăng bruă git gai wai lăng kơnuk kơna dua gưl, tơlơi pơmin dŏ hŭi, dŏ kă kư, hŭi ƀu anăm ngă ăt jing sa tơlơi kiăng lăng nao sit nik, tong ten, tơpă ară. Mơ̆ng tơlơi hơmâo sit nik djơh hăng anun, Khua ping gah să Quảng Phú, ơi Vũ Hồng Nhật lăi lĕ, gai pơkă  tơlơi thâo kơ ƀing khua apăn bruă tuč rơnuč ñu jing boh tơhnal amăng bruă mă.

 “Lơ̆m pơtong rơđah djơ̆ ngă gun khom pơtum pran jua mơnuih mă bruă, pơpha tơlơi gơgrong ba hăng krăp lăng pioh ƀuh anŏ pơblih amăng bruă mă sit nik; tơlơi tal dua dơ̆ng lĕ khom lăng nao kơ boh tơhnal pioh pơkă anŏ dưi ngă amăng bruă mă. Mơnuih ƀôn sang ƀu lăi nao kơ mơnuih apăn bruă hăng mrô rơnoh mông jơnum ƀudah hră pơar đôč ôh hăng bruă mă ƀuh sit nik, pơsir bruă ngă hăng anŏ pơblih mơ̆ng tơlơi gơñu ƀuh amăng tơlơi hơdip mơda”.

Tơlơi pơmin anai ăt pơkă tơhnal či kiăng sit nik hăng bruă mă čih anăn ruah khua dăp lui hlâo: Ƀu kơnong lăng nao kơ hră pơar, tơlơi hrăm ƀudah bruă ñu tom ngă đôč ôh, dŏ lăng nao kơ tơlơi thâo pơsir bruă mă sit nik, tơlơi thâo pơphun bruă mă hăng boh tŭ yua amăng bruă mă. Đĭ pơhiăp ƀơi mông jơnum, khua git gai ping gah tơring čar Dak Lak, ơi Lương Nguyễn Minh Triết lăi pơtong, pơkă hnơ̆ng, čih anăp dăp hlâo bruă mă, ruah mơnuih apăn bruă ngă khua, đing nao boh tŭ yua, mơnuih thâo bruă; mơ̆ng anun kiăng tañ ƀuh thâo krăn mơnuih hơmâo pran jua hiam, ngă bruă thâo, hơmâo kơnuih hiam laih anun gêh găl kơ bruă pioh pơtô pơhrăm, djru ba, kiăng dưi ngă djơ̆ bruă jao.

 “Anŏ kiăng pơđĭ kyar phrâo mơ̆ng tơring čar lĕ, kiăng ƀing ngă khua blung hlâo khom pơblih tơlơi pơmin, hơdră pơmin, hơdră ngă bruă  hăng tơlơi thâo rơnuk anai. Ƀing ta ƀu ngă bruă tui tơlơi tom găn rơgao đôč ôh. Khom pơblih kơtang mơ̆ng tơlơi pơmin, dơnong git gai jing pơtrut pơđĭ kyar, mơ̆ng bruă pơsir brơi đôč jing bruă ngă hơmâo boh tơhnal ƀuh pơđĭ kyar sit nik, dơ̆ng mơ̆ng pơmin ngă bruă sa guang bruă khăng khŏp, pơblih jing tơlơi pơmin mă bruă sui thun pơ anăp adih hăng abih bang laih anun lir hơbit amăng kual”.