Hrơi anai ăt lĕ hrơi jar kmar pơpŭ čơđai, lơ̆m pơčrông sai kơ bruă bơwih ƀong mơnuih mơnam kah hăng bơkơtuai gah rơngiao jơnum Khua pơ ala mơnuih ƀon sang dêh čar, lu khua mua rơkâo djop gưl, gơnong bruă kiăng hơmâo hơdră bruă tŭ yua amăng pơgang, pơgăn bruă bơrơtaih amăng sang hră, pơgô̆ mă hăng tơlơi truh sat hăng ƀing čơđai, sit biă ñu pơgang, pơgăn ƀlung ia amăng bơyan pơdơi prong. Tui khua mua, amăng hơdôm thun giăm anai, bruă kơtư̆ juă ƀing čơđai, sit biă ñu lĕ bơrơtaih amăng sang hră, pơ sang anŏ, mah hơmâo pơgang pơgăn samơ̆ ăt dŏ lu tơlơi amra ngă gêh tơnap dong.

Ƀing khua mua brơi thâo, kiăng kơtưn amăng pơgang pơgăn bruă bơrơtaih, pơgô̆ mă ƀing čơđai amăng hơdôm bruă tui gru grua, bơrơguăt drơi nă, tuai čuă ngu; đing nao pơjing anih ngui ngor, adôh suang, bơrơguăt drơi jăn brơi ƀing čơđai gưl să, sit biă ñu hơdôm boh să hơmâo tơlơi bơwih ƀong huă-mơnuih mơnam dŏ tơnap tap. Sa, dua čô khua ăt lăng, tơlơi gơgrong kơplah wah sang anŏ, sang hră hăng mơnuih mơnam amăng pơtô hrăm boh thâo amăng tơlơi hơdip brơi ƀing čơđai kiăng đing nao lu dong. Hơdôm anih anom pơtô hrăm kiăng tŏ tui pơtrut kơtang bruă pơtô pơblang, pơjing anih ngui ngor rơnuk rơnua brơi ƀing čơđai.

Mơguah hrơi anai (1/6), Khua pơ ala mơnuih ƀon sang dêh čar tŏ tui pơčrông sai ƀơi sang jơnum lăng glăi pơhrua boh than ngă tui akŏ bruă pơđĭ kyar bơwih ƀong huă-mơnuih mơnam hăng sang bruă prăk kơnuk kơna thun 2022; bruă ngă tui akŏ bruă pơđĭ kyar bơwih ƀong huă-mơnuih mơnam hăng sang bruă prăk kơnuk kơna hơdôm blan akŏ thun 2023; pơčrông sai ƀơi sang jơnum kơ hơdră tuh pơ alin pơhrua rơnoh prăk tui tơlơi pơkôl brơi Sang bruă prăk ngă hmua hăng pơđĭ kyar ƀon lan Việt Nam.