Mơng rơnuč thun hlâo truh ră anai, ƀơi tơring glông Dak R’lấp, tơring čar Dak Nông, bruă gun găn amăng pơhrui glăi lŏn mơnai brơi sang măi alumin Nhân Cơ ƀuh ƀơi hơdôm anih, mơng anih klơi mă wuăng tơl hơdôm anih klơi mă mrô 3 mơng luh lŏn mriah hăng luh mrô 2 anih pơkŏng glăi hlŭ tơdơi kơ rao rơgoh. Jơnum min mơnuih ƀon sang tơring čar Dak Nông hơmâo akŏ pơjing grup mă bruă kiăng pơsir hĭ tơnap tap, gun găn amăng hơdôm bruă mơng kông ti Nhôm Dak Nông-TKV, anom bruă wai lăng sang măi alumin Nhân Cơ (arăng iâu klah čun Grup 1644).

Ơi Nguyễn Quang Tứ, Khua Jơnum min mơnuih ƀon sang tơring glông Dak R’lấp brơi thâo, hăng tơlơi git gai mơng Jơnum min mơnuih ƀon sang tơring čar hăng gum hrŏm kjăp hăng hơdôm gơnong bruă, anom bruă amăng bruă pơhrui glăi lŏn mơnai brơi sang măi alumin Nhân Cơ glăk ƀơƀrư̆ pơsir hĭ. Sit biă ñu, hăng hơdôm anih klơi mă bôxit thun tal 4-6 (rơwang thun 2020-2022) hơmâo mă yua dưi pơanur 18 boh sang anŏ jao glăi lŏn mơnai hăng đơ đam giăm 15 ektar; pơgiong bruă jao lŏn ƀơi anih klơi lă mrô 2 dơnao pơkŏng glăi hlŭ mriah kiăng pơsir hĭ hlŭ bor lŏn tơhlom. Tơring glông glăk hrŏm hăng hơdôm gơnong bruă gir run tañ ngă pơgiong hră pơ-ar pok pơhai man pơdong 6 kual plơi pla phrâo brơi mơnuih ƀon sang.

“Hơdôm gơnam pioh sang măi pơkra pơjing, tơring glông hơmâo jao brơi TKV lĕ 15 ektar kiăng man pơkra truh lơ 15/4. Ră anai hơmâo 3 bruă kiăng ngă anun lĕ akŏ pơjing akŏ bruă nao mă glăi 1 boh sang anŏ, wai pơgang brơi 5 boh sang anŏ hăng pơanur 17 boh sang hăng đơ đam 13 ektar dong amra pơhlôm brơi lŏn brơi sang măi mă bruă truh lơ 1/6. Tal tlâo lĕ lŏn dŏ glăi anih klơi măi tal 7-8 hơmâo 77 boh sang anŏ hăng 73 ektar, amăng anun hơmâo 40 boh sang pŭ nao pơ anih phrâo tui hrơi mông pơkă amăng blan 4 anai tơring glông amra tŭ yap akŏ bruă mrô 2 pŭ nao man pơdong plơi pla phrâo”.

Ơi Nguyễn Bá Út, Khua gơnong bruă tuh tia pơka pơjing hăng sĭ mơdrô Dak Nông, kơ-iăng khua grup mă bruă 1644 mơng Jơnum min mơnuih ƀon sang tơring čar Dak Nông brơi thâo, bruă glêh tơnap hloh ră anai ƀơi sang măi alumin Nhân Cơ lĕ pơhrui glăi lŏn mơnai ƀơi anih klơi mă mrô 3 dơnao pơkŏng hlŭ mriah, dŏ 3 boh sang anŏ ƀu gưt jŭ yap glăi phun kyâo, gơnam pơdong amăng lŏn sang. Ring bruă dơnao pơkŏng mrô 2 sang măi klơi mă wuăng ăt aka ƀu dưi man pơdong yua dŏ 11 boh sang anŏ ƀu gưt pŭ đuăi. Tơring čar rơkâo Jơnum min mơnuih ƀon sang tơring glông Dak R’lấp tañ pơčrông sai hăng mơnuih ƀon sang, sem lăng kơ bruă gum djru pơhrua tui tơlơi pơkă, hăng hơmâo hơdră pơsir khut khăt ƀiă dong:

“Ră anai glăk đing nao hơdôm bruă kiăng hơmâo lu gơnam pioh pơkra pơjing brơi sang măi, hơdôm grup mă bruă pơsit tong ăt hơđong mơn. Samơ̆ kual lŏn ƀơi anih mrô 2, 3 dŏ gun găn, wŏt bruă mơnuih ƀon sang ƀu gưt jŭ yap, yua anun kiăng hơmâo hơdră jŭ yap glăi. Tơdah ƀu dưi pơsir hĭ mah hơmâo lu gơnam pioh pơkra pơjing ăt ngă tơnap mơn, sang măi amra pơdơi mă bruă”.

Bruă pơsir hĭ tơnap tap, gun găn amăng bruă mă mơng Kông ti Nhôm Dak Nông, tui ơi Lê Trọng Yên, Kơ-iăng khua Jơnum min mơnuih ƀon sang tơring čar Dak Nông, tơring čar hơmâo hơdôm tơlơi git gai tong ten brơi rĭm gơnong bruă, Jơnum min mơnuih ƀon sang tơring glông Dak R’lấp kah hăng gah kông ti Nhôm Dak Nông. Hơdôm anom bruă kiăng pơsir hĭ khut khăt ƀiă dong, đing nao hloh ngă pơgiong hơdôm bruă jao, pơhlôm brơi sang măi alumin Nhân Cơ dưi mă bruă hơđong, pơgôp yôm phăn amăng bruă pơđĭ kyar bơwih ƀong huă mơnuih mơnam ƀơi ƀon lan./.