Tlam lơ 21/3, ƀơi Ƀirô mă bruă, Khua mir sir ơi Võ Văn Thưởng tŭ jum kơ-iăng Khua dêh čar, Khua ding jum pơtom hiăp hăng ngă hrŏm jar kmar Kur Prak Sokhonn ƀrô hrơi rai čuă sit nik dêh čar Việt Nam hăng git gai hrŏm mông jơnum tal 20 Jơnum min pơlir hơbit Việt Nam - Kur kơ bruă ngă hrŏm bơwih ƀong, gru grua, boh thâo phrâo.

Amăng mông bưp, Khua mir sir ơi Võ Văn Thưởng đăo gơnang Kur amra pơphun truh kih tal plĕ hră ruah Khua pơ ala mơnuih ƀon sang dêh čar amăng blan 7/2023, tŏ tui hơmâo lu tơlơi dưi prong prin amăng bruă pơjing lŏn ia Kur rơnuk rơnua, hơđong, ngă pô hăng pơdrong asah.

Việt Nam lêng kơ lăng yôm hăng čang rơmang ƀu pơdơi pơtrut tơlơi rô nao rai hiam klă, giang mah gru grua, ngă hrŏm djop mơta, hơđong kjăp sui thun dong hăng dêh čar Kur. Kơ-iăng Khua dêh čar, Khua ding jum pơtom hiăp Kur pơsit tong dêh čar Kur lêng kơ lăng yôm tơlơi rô nao rai giang mah hăng ngă hrŏm hăng dêh čar Việt Nam. Pơpŭ hơdôm tơlơi dưi pron prin mơ̆ mơnuih ƀon sang Việt Nam dưi ngă amăng pơđĭ kyar bơwih ƀong huă-mơnuih mơnam; đăo gơnang Việt Nam amra pơgiong hơnong pơkă pơplih jing dêh čar pơđĭ kyar tuh tia pơkra pơjing amăng thun 2030.  

Ƀơi Ƀirô mă bruă Kơnuk kơna, Khua dêh čar ta ơi Phạm Minh Chính ăt hmâo tŭ jum mơn Kơ-iăng Khua dêh čar, Khua Ding jum pơtom hiăp hăng Gum hrom jar kơmar dêh čar Kur Prak Sokhonn. Kiăng ngă brơi tơlơi rô nao rai dua bôh dêh čar pơđĭ kyar dong, jai hrơi jai ba glăi bôh tơhnal, Khua dêh čar ta ơi Phạm Minh Chính rơkâo dua bơnah đing nao pok pơhai ba glăi bôh tơhnal hơdôm tơlơi pơkôl gưl dlông, hơdôm tơlơi lăi pơtŏng hrom kơplah wah dua bôh dêh čar; pơtrut kơtang gum hrom, tô nao rai jơlan glông, tô nao rai bruă bơwih ƀong dua bơnah, gum hrom pơdŏng bruă bơwih ƀong rơngai, gơgrong pô nao hrom hăng bruă mut hrom jar kơmar dơlăm prong, sit nik hăng ba glăi bôh tơhnal.

Amăng mông thun 2023 pok phun lu bruă jơnum yôm phăn mơng Kur, amăng anun hmâo ruah khua pơ ala mơnuih ƀôn sang tal 7, Jơnum bơkơjăp drơi jăn kual Đông Nam Á tal 32 (SEA Games 32) hăng Jơnum bơkơjăp drơi jăn mơnuih ƀu klă drơi jăn Đông Nam Á (Para Games), Jơnum gưl dlông kual Čơlah 3 pơđĭ kyar Kur – Lao – Việt Nam tal 12, Khua dêh čar pơtŏng sit, amăng bruă dưi ngă mơng pô, Kơnuk kơna Việt Nam amra djru, lăi pơthâo tơlơi găn rơgao hăng dŏng yua dêh čar Kur pơphun truh kih hơdôm bruă jơnum anai./.