Kơ-iăng Khua dêh čar ơi Lê Minh Khái brơi thâo, blan hlâo ñu hăng Kơ-iăng Khua dêh čar Hàn Quốc Kyungho Choo hmâo gum hrom git gai jơnum Bơkơtuai kơ gum hrom bơwih ƀong gưl Kơ-iăng Khua dêh čar Việt Nam – Hàn Quốc tal 2. Dua bơnah lăi pơthâo nao rai tơlơi tŭ ư hrom lu bôh yôm phăn kiăng pơtrut tơlơi rô nao rai bơwih ƀong kơplah wah 2 bôh dêh čar. Kơ-iăng Khua dêh čar ơi Lê Minh Khái đăo gơnang lĕ, hăng tơlơi găn rơgao mơng pô, NACF ăt gum hrom klă mơn hăng Kơnuk kơna Việt Nam djru pơđĭ kyar bruă đang hmua, plơi pla, mơng anun djru pơđĭ kyar bơwih ƀong – mơnuih mơnam mơng Việt Nam.

Kơ-iăng Khua dêh čar Lê Minh Khái hăng Khua Khul Lee Sung Hee ăt lăi pơthâo nao rai mơn sa dua bôh yôm bơdjơ̆ nao bruă pơphun jơnum ngui sang čơ sĭ gơnam mă mơng đang hmua ƀơi Pusan; bruă mă mơng Sang prăk NH Bank ƀơi Việt Nam; kơtưn sĭ blơi gơnam kơ dêh čar tač rơngiao, gơnam mă mơng đang hmua dua bơnah,... kiăng pơtrut tơlơi rô nao rai kơplah wah 2 bôh dêh čar amăng bruă anom mă bruă hrom pơđĭ kyar sit nik, ba glăi bôh tơhnal pơ̆ anăp anai./.