Kơ-iăng Khua dêh čar ơi Lê Thành Long, Khua khul git gai gum hrŏm kual lŏn dăo ia krông Cửu Long git gai mông jơnum. Tui lăi pơthâo mơng Ding jum kơčăo bruă hăng tuh pơ alin, thun 2024, bruă pơđĭ kyar bơwih ƀong huă mơnuih mơnam kual lŏn dăo ia krông Cửu Long ba glăi lu boh than. Rơnoh pơđĭ kyar bơwih ƀong huă amăng kual 7,31%, lu ƀiă rơnoh pơđĭ kyar hrŏm amăng đơ đam dêh čar (giăm 7%). Lu akŏ bruă, ring bruă phun amăng kual hơmâo pok pơhai, pơjing, ngă gêh gal brơi bruă tô nao rai amăng kual, pơlir amăng kual. Samơ̆, tơlơi bơwih ƀong huă-mơnuih mơnam đơ đam kual dŏ lu tơnap tap, bruă bơwih ƀong huă amăng kual dŏ anet; 12/13 boh ƀon lan amăng kual aka ƀu pơhlôm bruă mă yua hăng pơhrui ngăn drăp, rơnoh pơđĭ kyar aka ƀu hơđong.

Bruă ia mơsin ram hyu kơtang, ba truh kơ bruă kơƀah ia mơmih brơi kơ mơnuih yua hăng ngă đang hmua. Đĭ pơhiăp pơđut mông jơnum, Kơ-iăng khua dêh čar ơi Lê Thành Long rơkâo djop ƀon lan kiăng gir run ngă tui bruă jao amăng git gai gum hrŏm amăng kual, pơsir hĭ hơdôm tơlơi lông ră anai. Hăng hơdôm akŏ bruă akŏ phun mơng kual pơ anăp anai, kiăng đing nao kah pha prăk kak brơi hơdôm akŏ bruă akŏ phun amăng dêh čar, akŏ bruă man pơkra jơlan glông akŏ phun pơgôp pơtrut pơđĭ kyar bơwih ƀong huă-mơnuih mơnam tañ, hơđong kjăp.