Ƀơi mông bưp, Kơ-iăng khua dêh čar ơi Lê Tiến Châu lăi pơtong, Việt Nam lăng kơ dêh čar Japan jing sa amăng hơdôm bơnah ngă hrŏm ba akŏ hlâo, jing gơyut gơyâo tong ten, đăo kơnang, hrŏm hơbit amăng rơnuk rơbâo thun pơđĭ kyar phrâo.

Kơ-iăng khua dêh čar rơkâo dua bơnah dêh čar ăt ngă kơjăp tui tơlơi đăo kơnang gah bruă kơđi čar, djă pioh mông bưp nao rai khua mua pơprong, djă kơjăp tơlơi gơgrong mơ̆ng djop sang bruă čih pơkra tơlơi phiăn kiăng ngă gêh găl kơ bruă pok pơhai ngă tui abih bang hră pơkôl bơwih ƀong huă sĭ mơdrô ƀơi dua bơnah. Laih dơ̆ng, pơtrut bruă ngă hrŏm ba tuai hyu ngui, jĕ giăm mơnuih ƀôn sang dua bơnah hăng bruă dêh čar Japan ăt djru ba mơnuih ƀôn sang Việt Nam, rơbêh 700.000 čô hlăk dŏ mă bruă, hrăm hră ƀơi dêh čar Japan.