Nao pơhmư̆ hăng pơhiăp ƀơi mông jơnum, Kơ-iăng khua dêh čar ơi Nguyễn Chí Dũng lăi, lơ 16/4/1975 jing kơđŏm gru hing ang amăng thun blan ngă hơkrŭ lŏn ia mơ̆ng Ping gah, tơhan hăng mơnuih ƀôn sang Ninh Thuận - kual lŏn tơhan sông kơtang, khin hơtai, hơmâo brơi miđai “Tơhan blah ngă sông kơtang”. Tơdơi kơ hrơi rơngai, găn rơgao tơnap tap hăng ayuh hyiăng ƀu lăp, Ninh Thuận ƀơ ƀrư̆ hrưn đĭ.

Mơ̆ng sa boh tơring čar rin, ră anai Ninh Thuận hơmâo prăk pơhrui đĭ laih, rơnoh đĭ kyar 8,74%, dong amăng mrô đĭ kyar lu mơ̆ng dêh čar. Kơ-iăng khua dêh čar kiăng tơring čar pơtrut tui gru grua đưm, pơtrut pơčeh phrâo, mơneč mă tơlơi gêh gal, pơjing kual lŏn pơ-iă hang anai jing kual lŏn đĭ kyar hơđong kjăp, ngă tŭ yua bruă dăp glăi anom bruă kơnuk kơna, akŏ pơdong gong gai dua gưl tui hăng tơlơi pơtrun, anăp nao Jơnum ruah khua ping gah dêh čar tal 14.