Tui hăng Kơ-iăng Khua Ding jum mă bruă čar Nguyễn Thị Hà, gưl să tơdơi kơ pơmut amra dưi pơjing hơdôm anom mă bruă čar pioh tŭ mă hăng pơsir hră pơ-ar kơ mơnuih ƀôn sang hăng anom bơwih ƀong. Hơdôm mơta hră pơ-ar hlâo adih gah gưl tơring glông amra dưi pơtô glăi ƀơi anăp kơ gưl să. Jơlan pơsir hră pơ-ar bruă čar amra dưi rơbô̆t, hrŏ trun yak găn rơgao rơwang tŏng krah.

“Gong gai gưl să amra dưi jao lu tơlơi dưi hloh, pơphun bruă čar hăng hơdră djru prăk kơ mơnuih apăn bruă, mă bruă čar ăt amra dưi pơplih phrâo, pơhlôm amra djơ̆ tui tơlơi kiăng kơ bruă jao. Gah hră pơ-ar hlâo adih ngă tui ƀơi gưl tơring glông lĕ amra yua kơ gưl să ƀơi anăp ngă tui. Yua anun, khom kơtưn mă yua hơdră phrâo măi mok, pơplih mrô amuñ hloh, hră pơ-ar hăng ngă ƀiă hrơi mông ngă tui hră pơ-ar djru kơ mơnuih ƀôn sang hăng anom bơwih ƀong klă hloh”.

Nai prin tha Nguyễn Văn Đáng, mă bruă ƀơi Sang hră pơtô bruă kơđi čar Hồ Chí Minh dêh čar ta lăi lĕ: Ƀu hmâo khul mă bruă gong gai gah tơring glông, năng ai ñu 2/3 bruă jao mơ̆ng gưl tơring glông amra dưi jao kơ gưl yŭ. Hrŏm hăng anun, gưl să, phường ăt amra dưi jao tơlơi dưi lu hloh mơn, jing hơdôm anom bruă wai lăng kơnuk kơna sit nik giăm hăng mơnuih ƀôn sang:

“Ƀing ta khom dăp glăi hơdră pioh pơpha glăi bruă mă, bruă jao mơ̆ng gong gai gưl să hiưm ñu? Gah hơnong ñu lĕ abih bang hơdôm bruă bơwih kiăng hloh kơ mơnuih ƀôn sang kơ anom bơwih ƀong lĕ tâ̆o hloh ba truh gưl să, pioh sit nik jing gong gai kiăo tui tơlơi kiăng mơnuih ƀôn sang hăng anom bơwih ƀong hăng mơ̆ng anun anăp nao truh djơ̆ bruă mă lĕ giăm mơnuih ƀôn sang, mă bruă hăng djru mơnuih ƀôn sang klă hloh bơhmu hăng hlâo”.

Amăng hơdôm hrơi glông bruă kơđi čar tơring čar glăk pơphun glăi tui jơlan gah rơbô̆t, tŭ yua hăng ba glăi bôh tơhnal, mơnuih apăn bruă gưl să amra khom glăm ba dong lu bruă jao phrâo, hăng mrô bruă mă jai hrơi jai prong hăng tơlơi rơkâo hmâo bôh thâo kơjăp jai hrơi jai prong. Tơlơi anai kiăng biă khom pơđĭ dlông bôh thâo, rơnoh hrăm hăng anô̆ kơjăp mơnuih apăn bruă, mơnuih mă bruă čar gưl să kiăng djơ̆ tui tơlơi čang rơmang kơ sa bruă mă čar rơnuk phrâo, giăm mơnuih ƀôn sang hăng djru mơnuih ƀôn sang klă hloh. Nai prin tha Nguyễn Đức Hà, Khua apăn bruă hơđăp Grŭp wai lăng bruă ruah mơnuih apăn bruă dêh čar ta, lăi tơlơi pơmin:

“Rơkâo mơnuih apăn bruă gưl să giăm mơnuih ƀôn sang, ƀơi anăp pơsir hơdôm bruă bơdjơ̆ nao mơnuih ƀôn sang. Dua lĕ hơdôm hơdră pơtrun, jơlan gah, hơdră bruă mơ̆ng Ping gah, Kơnuk kơna leng kơ pơƀut nao plơi pla să abih, tui anun mơnuih apăn bruă ƀơi gưl să khom hmâo tơhnal lu mơta, anun lĕ ngă sa bruă samơ̆ ăt thâo lu mơn bruă pơkon dong, hmâo tui anun kah mơ̆ng dưi ngă bruă”.

Gưl să phrâo khom djop bôh thâo ngă tui hơdôm bruă hmâo jao, samơ̆ ăt pơhlôm nao hrŏm hăng mơnuih ƀôn sang ƀơi plơi pla. Yua anun, ơi Hoàng Văn Cường, Khua pơ ala mơnuih ƀôn sang dêh čar ta tal 15 rơkâo đĭ bruă pơpha gưl, pơpha bruă apăn kơ gưl să tui tơlơi pơkă “plơi pla pơsit, plơi pla ngă, plơi pla gơgrong”:

“Ƀing ta ăt khom hmâo mơn hơdră pơkă pơpha gưl rah, pơphra bruă apăn rah samơ̆ bruă gơgrong khom kiăo tui tơlơi dưi. Tơlơi dưi anun lĕ khom năo hrŏm hăng bruă gơgrong. Ƀing ta khom hmâo sa hơdră pel ĕp, lăng tui, pơsit pioh pơhlôm lĕ mơnuih apăn bruă gah yŭ ƀu ngă tui hơdôm bruă apăn, bruă jao hơdơ̆ hor ôh. Pơpha gưl pơpha bruă apăn khom ngă tui klă hơdôm tơlơi pơkă mơ̆ng Kơnuk kơna, hrŏm hăng anun kiăng hmao tlôn tơlơi kiăng mơnuih ƀôn sang”.

Ƀơi sa rơnoh pơkon, Nai tha prin, nai prin tha Đinh Xuân Thảo, Khua Anom kơsem min tơlơi phiăn mơ̆ng Khua pơ ala mơnuih ƀôn sang dêh čar lăi lĕ pơđĭ tơlơi dưi kơ gưl să samơ̆ khom hmâo tơlơi tô nao rai kơplah wah gưl tơring čar hăng gưl să pioh pơhlôm djop bruă dưi hluh gah, ba glăi bôh tơhnal:

“Rơđah biă ñu ƀơi anai lĕ gưl tơring čar ƀơi anăp nao pơ̆ să hăng khom hmâo tơlơi tô nao rai kơjăp sit nik, hluh gah, pơhlôm lĕ pơlir nao rai na nao pioh gưl să dưi pơsir bruă mă ba glăi bôh tơhnal găh yŭ tơlơi wai lăng, krăp lăng, lăng tui hăng pơtô ba hăng djru hmao tlôn mơ̆ng gưl tơring čar. Anai lĕ tơlơi kiăng biă, yôm phăn pioh pơhlôm kơ tơlơi gơgrong pô, gơgrong mă pô hăng ngă giong klă bruă jao wai lăng mơ̆ng gong gai gưl să hmâo rơnoh prong tơdơi kơ pơmut hrŏm”.

Pơhiăn klah čun amăng mông pơđut Jơnum Ping gah dêh čar lok 11, tal 13, Khua git gai Ping gah dêh čar ta ơi Tô Lâm hmâo lăi rơđah, hăng hơdră pơphun bruă čar phrâo, gưl tơring čar amra jing pô gơgrong ba dua, jing pô ƀơi anăp ngă tui hơdră pơtrun, hơdră bruă mơ̆ng Ping gah dêh čar, laih anun jing gưl gơgrong hlâo mă yua hơdră bruă lăp djơ̆ hăng bôh nik hmâo pơđĭ kyar mơ̆ng plơi pla, hrŏm hăng anun ƀơi anăp črâo ba, wai lăng abih bang bruă mă mơ̆ng gưl să. Lơm anun, gưl să dưi pơsit lĕ gưl phun akô̆ pơjing bruă ngă tui hơdôm hơdră bruă mơ̆ng dêh čar truh gưl tơring čar samơ̆ amra dưi kơtưn kơtang pơpha gưl, pơpha bruă apăn. Gong gai gưl să amra hmâo tơlơi dưi mă yua hră pơ-ar pơkă tơlơi phiăn pioh pơsit bruă ngă tui tơlơi phiăn ƀơi să hăng pơsir hơdôm tơlơi gah pô dưi. Khua git gai Ping gah dêh čar ăt pơtŏng sit mơn, gong gai să tơdơi kơ dưm dăp khom djơ̆ tui tơlơi kiăng rơbô̆t, ba glăi bôh tơhnal, giăm mơnuih ƀôn sang hăng djop bôh thâo wai lăng mơnuih mơnam rơnuk anai, anăp nao tơhnal đĭ kyar tañ, pơđĭ kyar kơjăp, djru klă hloh tơlơi hơdip mơnuih ƀôn sang./.