Kơ-iăng Khua dêh čar ơi Nguyễn Hòa Bình hmâo pel ĕp laih, hơduah ĕp kual pơkă hlâo tuh pơplai bruă pơkra glăi, pơkra rơdêh por răm ƀơi Tơdrun tum păn Jar kơmar Vân Đồn (tơring glông Vân Đồn, tơring čar Quảng Ninh). Kơ-iăng Khua dêh čar ta rơkâo hơdôm Ding jum, gơnong bruă, Jơnum min mơnuih ƀôn sang tơring čar Quảng Ninh gum hrŏm kơjăp hăng pô tuh pơplai pioh pơhlôm rơnoh pơdŏng pơkra mơ̆ng rơwang bruă, mơ̆ng anun ngă pơhưč ƀing tuh pơplai mơ̆ng dêh čar tač rơngiao gum hrŏm amăng bruă pơkra ming, pơkra glăi ƀat tô tơdrŏn rơdêh pôr  ƀơi Tơdrun tum păn Jar kơmar Vân Đồn.

Kiăo tui anun, grŭp hyu mă bruă hmâo pel ĕp sa dua rơwang bruă pơkon ƀơi anai, kah hăng Rơwang bruă tuh pơplai pơdŏng kual tuai čuă ngui, pơdơi pơdă, ngui ngor (amăng anun hmâo bơwih ƀong sĭ mơdrô casino, lŏn sang, bơwih ƀong gah sang jưh tuai, sang pơdŏng pioh tuai nao pơdơi pơdă, resort...) ƀơi să Vạn Yên, tơring glông Vân Đồn yua kơ grŭp Sun Group ngă pô tuh pơplai. Tơdơi kơ hmư̆ tơlơi lăi pơthâo glăi tơlơi gun ăt kah hăng ba tơbiă mơ̆ng pô tuh pơplai hrŏm hăng Jơnum min mơnuih ƀôn sang tơring čar Quảng Ninh, Kơ-iăng Khua dêh čar Nguyễn Hòa Bình jao kơ hơdôm Ding jum, gơnong bruă pơƀut glăi, lăi pơthâo glăi, ba tơbiă Gong gai dêh čar ta hmâo jơlan gah pơtlaih amăng rơwang tañ hloh./.