Tlam lơ 4/6, Kơ-iăng khua dêh čar ơi Phạm Gia Túc nao jơnum hrŏm hăng hơmâo tơlơi pơhiăp ƀơi mông pok jơnum. Hăng akŏ tơlơi jơnum “Bưp nao rai tŭ yua sit nik-Jơlan anăp nao pơ kơñ pơgi”, jơnum anai hơmâo 150 wơ̆t pơčrong sai nao rai dơlăm sa bruă, pơtum nao amăng tơlơi pơprong bơwih ƀong huă ƀơi rŏng lŏn tơnah plah wah tơlơi pơtlă anăp hăng bruă či ngă hrŏm; dăp glăi jơlan hơdră bơwih ƀong huă dêh čar Nga pioh pơwơ̆t glăi hăng glông jơlan dar hrŏm rơnoh pơđĭ kyar; hơdôm bruă kơsem min ia rơgơi akŏ pơjing brơi pơ anăp adih; mơnuih mơnam amăng rơnuk ba yua ia rơgơi mrô; boh tŭ yua hăng hơbô̆ bruă pơđĭ kyar phrâo.

Pơhiăp ƀơi mông pok jơnum, Kơ-iăng khua dêh čar ơi Phạm Gia Túc lăng yom hơdôm wơ̆t jơnum pơčrong sai sa hnơ̆ng bruă, lăi nao tơlơi pơhing hlăk hơmâo hăng bruă yom kah hăng pơtrut pơđĭ kyar phrâo amăng tơlơi bơwih ƀong huă, pơblih yua mrô, ia rơgơi ană mơnuih pơjing, pơhlom hơđong bơwih ƀong huă, tơlơi gơgrong ba mơ̆ng atur bơwih ƀong huă phrâo đĭ hăng pơđĭ kyar hlom bom.