Amăng mông bưp, Kơ-iăng khua dêh čar ơi Trần Hồng Hà lăi pơtong: Hăng tơlơi dưi kơ apui lơtrik pơplih pơkra glăi (drai ia apui lơtrik, jua angĭn, pơ-iă yang hrơi), Lao amra jing anih akŏ phun pơkra rai apui lơtrik hơdjă, pơplih mơtah blung a amăng kual hăng rŏng lŏn tơnah. Anai lĕ sa amăng hơdôm anŏ pơhưč anom bruă tuh pơ alin pơgi kơdih anai.

Hok mơ-ak lơ̆m hơdôm tơlơi pơkôl hơmâo kĭ kơplah wah anom bruă kơsem min boh thâo măi mok Việt Nam hăng Ding jum boh thâo măi mok hăng pôr pơhing Lao, kơ-iăng khua dêh čar ơi Trần Hồng Hà čang rơmang dua bơnah pơtrut kơtang ngă hrŏm, pơplih mă yua boh thâo măi mok kiăng dua bơnah gum hrŏm ngă tui bruă pơplih yua boh thâo, pơplih mơtah tañ hloh pơ anăp. Amăng bruă pơtô hrăm, pơđĭ kyar mơnuih mă bruă. Kơ-iăng khua dêh čar rơkâo: Ding jum boh thâo măi mok hăng pôr pơhing Lao kiăng pơsit tong ten, gum hrŏm hăng anom bruă kơsem min boh thâo măi mok Việt Nam pơjing akŏ bruă gưl gơnong glông, ngă gêh gal, pơhlôm kjăp kiăng ngă hrŏm, gum hrŏm Việt Nam amăng thun blan pơplih phrâo.