Tui hăng anun, dua bơnah tŭ ư pok pơhai klă hiam djop bruă mă jĕ giăm, bưp nao rai khua mua pơprong, djop anom bruă; pơđĭ tui tơlơi glăm ba gơgrong phun bruă mơ̆ng Jơnum min git gai ngă hrŏm dua bơnah, pơtrut pơsur, pel ĕp tơlơi pơhing tong ten kiăng dua bơnah thâo hluh rơđah bruă mă anŏ kiăng mơ̆ng khua mua dua bơnah pơtrun laih; Pok pơhai klă bruă ngă hrŏm gah ling tơhan, pơgang rơnuk rơnua; Kơtưn pơtruh nao rai bruă mă yôm, boh nik ñu čuk pơkra jơlan rơdêh treng, jơlan nao rai ƀơi lŏn;

Pơtrut hmar bruă pok, pơđĭ tui laih anun tŭ yap amăng jang jơlan guai dêh čar, pok pơhai man pơdong anih anom mă bruă, wai pơgang amăng jang jơlan guai dêh čar thâo rơgơi, kiăng ngă gêh găl brơi kơ gơnam sĭ mơdrô mơ̆ng Việt Nam nao tañ pơ dêh čar Khač, hlong ba nao truh pơ dêh čar tal klâo tui jơlan rơdêh treng Á-Âu (kual ASIA-kual Mi kô̆); ngă hrŏm tong ten amăng bruă wai lăng, pơgang jơlan guai dêh čar tui hăng hră kĭ pơkôl jơlan guai dêh čar ƀơi lŏn hăng pel ĕp bruă mă aka ƀu tŭ ư nao rai ƀơi kual ia rơsĭ tui hăng Hră pơkôl jar kmar Sang gum hơbit djop dêh čar kơ Tơlơi phiăn ia rơsĭ thun 1982.