Ngă tui tơlơi črâo ba mơ̆ng Khua dêh čar, lơ 7/4, ƀơi tơring čar Tiền Giang, Kơ-iăng Khua dêh čar ta ơi Trần Hồng Hà hrŏm hăng ơi Lê Minh Hoan - Khua Ding jum đang hmua hăng pơđĭ kyar ƀôn lan dêh čar hăng ơi Đặng Quốc Khánh - Khua Ding jum kông ngăn glai klô hăng rơhuông adai lŏn mơnai git gai mông jơnum lăng nao rai mơ̆ng ataih hăng hơdôm bôh tơring čar Kual lŏn dăo ia krông Cửu Long anun lĕ: Tiền Giang, Bến Tre, Sóc Trăng, Cà Mau, Kiên Giang, Bạc Liêu, Long An kơ bruă anai.

Bơyan phang khôt thun anai, yua kơ ia ƀơi ia krông Mê Kông hrŏ trun 7% bơhmu hăng hơnong ñu hơdôm thun hlâo adih, anun Kual lŏn dăo ia krông Cửu Long gơgrong ba mơ̆ng ia mơxin hram tañ, dơlăm hloh hơnong ñu lu thun, hơjan truh kaih, biă ñu hmâo 3 tal phang khôt ngă kơtang truh akô̆ blan 5. Pơhiăp amăng mông mă bruă hăng grŭp hyu mă bruă mơ̆ng Gong gai dêh čar ta, khua hơdôm bôh tơring čar rơkâo hơdôm Ding jum, gơnong bruă dêh čar ta hăng Gong gai dêh čar djru pơdŏng pơkra giong hơdôm ring bruă ia yua pioh sir hĭ ñu, dơnao kŏng ia ƀlăng, hơdôm ring bruă pioh kơ ia hơdjă yua hơbit ƀơi kual kơtuai hang ia rơsĭ, pơsir tơlơi lŏn tơhlom, tơhroh... Pơhiăp klah čun mông mă bruă, Kơ-iăng Khua dêh čar ta ơi Trần Hồng Hà pơtă hơdôm bôh tơring čar Kual lŏn dăo ia krông Cửu Long khom lăng tui tơlơi găn rơgao amăng bruă pơgang pơgăn ia mơxin hram, pơsit glăi ia klơi khoer, hmâo jơlan gah gơgrong hlâo hơdip hrŏm hăng tơlơi ia mơxin hram tui rim anih anom, sir klep hơdôm bôh anom pơdŏng pơkŏng ia yua./.