Ƀơi tơring čar Hậu Giang, Kơ-iăng Khua dêh čar ơi Trần Hồng Hà hrom hăng grŭp hyu mă bruă mơng Kơnuk kơna hmâo mă bruă hăng hơdôm ding jum gơnong bruă hăng hơdôm tơring čar ƀôn prong Kual lŏn dăo ia krông Cửu Long kơ gơnam pioh yua kơ hơdôm bruă pơkra jơlan nao rai phun amăng kual. Tui hăng Ding jum wai lăng jơlan nao rai hăng dŭ pơgiăng, ră anai ƀơi kual glăk pok pơhai tuh pơplai 8 rơwang bruă jơlan đuăi hmar hăng 5 rơwang bruă pơkra glăi, pok prong, pơkra phrâo hơdôm ară jơlan hăng tơdrông toa ƀơi jơlan nao rai prong, hăng abih bang prăk mă yua năng ai ñu 112.600 klai prăk.

Mơng ră anai truh thun 2025, tơlơi kiăng kơ gơnam mă yua pơkra jơlan prong biă, năng ai ñu giăm truh 50 klăk met khô̆i. Klah čun amăng mông mă bruă, Kơ-iăng Khua dêh čar ta ơi Trần Hồng Hà brơi thâo, tui hăng mrô hmâo, jŭ yap lĕ mrô gơnam pioh yua ăt djop mơn kơ hơdôm rơwang bruă, lăp đing nao hmâo dong gơnam pioh yua lĕ lŏn ƀơi Long An, khă hnun hai Ding jum wai lăng jơlan nao rai dŭ pơgiăng kiăng tañ pơsit mơn tơlơi kiăng kơ bôh thâo mơng lŏn anai. Hăng hơdôm anih anom amăng kual, Kơ-iăng Khua dêh čar ta rơkâo gơgrong hlâo đĭ 50% rơnoh kơtang hơdôm anih mă čuah ră anai glăk mă yua./.