Pơhiăp ƀơi mông jơnum, Kơ-iăng khua dêh čar Trần Hồng Hà pơsit, thun blan rơgao, hră pơhing hơkrŭ Việt Nam hơmâo lăng bruă tơpă sit, lăng nao amăng abih bang tơlơi tơlơi hơdip, tơlơi čang rơmang, tơlơi kiăng khăp mơng mơnuih ƀon sang. Hră pơhing hơmâo gơgrong bruă ba jơlan hlâo črâo brơi tơlơi pơmin hiam - pôr pơhing, nao hlâo pôr pơthâo tơlơi pơhing sit, rup hiam mơng Việt Nam “rơnuk rơnua, hơđong kơjăp, rơngai, jê̆ giăm, pơđĭ kyar”.

Kơ-iăng khua dêh čar ơi Trần Hồng Hà kiăng djŏp Khul lăng glăi jơlan hơdră ngă bruă mơng hơdôm anom bruă tơlơi pơhing kiăo tui tơlơi hơmâo sit nik, lăi pơthâo dlăm, abih bang tơlơi hơdip đah mơng hơmâo lu hră pơhing klă, pơƀuh pran jua kơtưn pơ anăp, hơmâo tơlơi pơmin pran jua hiam. Hơdôm anom bruă čih tơlơi pơhing ăt akŏ pơdong mơnuih mă bruă rơgơi, hơmâo lăng kar hăng ƀing kơhnâo bơwih ƀong, pơtom hiăp, adoh suang, boh thâo măi mok.