Amăng mông tŭ jum, Kơ-iăng Khua dêh čar Trần Lưu Quang pơdah pran jua mơ-ak Tơlơi rô nao rai gum hrom kơplah wah Việt Nam hăng Australia jai hrơi pơđĭ kyar kơjăp kơtang, mut nao dơlăm, sit nik amăng lu bruă, pha ra, sĭ mơdrô nao rai dua bơnah đĭ kyar kơtang, hmâo 16 klai 100 klăk dolar Mi amăng thun 2022, đĭ rơbêh kơ 30 wot bơhmu hăng thun 2021, ngă brơi Australia jing bơnah sĭ mơdrô nao rai prong tal 10 mơng Việt Nam hăng Việt Nam jing bơnah sĭ mơdrô nao rai gơnam prong tal 7 mơng Australia.

Kơ-iăng Khua dêh čar ta rơkâo dua bơnah gum hrom kơjăp kiăng pơphun klă hơdôm bruă mă hơdor glăi 50 thun pơjing bruă pơtom hiăp Việt Nam hăng Australia amăng thun 2023, amăng anun hmâo bruă prăp lui tŏng teng kơ hơdôm bruă bơkơtuai gah grŭp kơplah wah dua bơnah dêh čar pơ̆ anăp anai. Hluai tui phun than rô nao rai kơplah wah dua bơnah klă hiam, dua gơñu hmâo lăi rơđah tơhnal yôm phăn mơng bruă pơhlôm rơnuk rơnua, hơđong, gum hrom amăng kual hăng ƀơi rŏng lŏn tơnah; pơpŭ Phiah phiăn Sang gum hơbit djop dêh čar hăng tơlơi phiăn jar kơmar./.