Amăng mông jơnum, Kơ-iăng khua git gai pơ ala mơnuih ƀon sang dêh čar ơi Trần Thanh Mẫn pơsit dêh čar Việt Nam lêng kơ lăng yôm hăng čang rơmang pơtrut tui tơlơi rô nao rai ngă gŏp yôm hăng Español; lăng yôm hơdôm tơlơi pơplih klă amăng bruă rô nao rai dua kơnuk kơna, dua anom bruă pơ ala mơnuih ƀon sang amăng hrơi blan rơgao.

Kơ-iăng khua pơ ala mơnuih ƀon sang dêh čar ta bơni kơ Español jing sa amăng hơdôm boh dêh čar kual EU tañ pơsit brơi tơlơi pơkôl pơgang ba bruă tuh pơ alin EU - Việt Nam (EVIPA) laih anun rơkâo amăng rơwang bruă ngă Khua EU, Español pơgôp hiăp kiăng Ƀirô khua pơ ala mơnuih ƀon sang hơdôm boh dêh čar EU aka ƀu pơsit brơi hră EVIPA tañ pơsit brơi, djru pơtrut tui tơlơi ngă hrŏm tuh pơ alin dua bơnah bơkơnar, tŭ yua hrŏm, gum ngă gêh gal kơ anom bơwih ƀong kual Mi Kô̆ glăk tuh pơ alin sĭ mơdrô ƀơi Việt Nam.