Ƀơi mông bưp, Kơ-iăng khua git gai pơ ala mơnuih ƀôn sang dêh čar ta pơsit, Việt Nam lăng yôm laih anun čang rơmang pơđĭ tui tơlơi ngă hrŏm amăng lu bruă hloh hăng Hungary, jing dêh čar ngă gŏp prong amăng abih bang bruă blung a, hăng ha sa anun yơh truh mông anai mơ̆ng Việt Nam ƀơi kual Trung Đông Âu.

Kơ-iăng khua git gai pơ ala mơnuih ƀôn sang dêh čar čang rơmang dua bơnah pơđĭ tui bruă pơbưp, jơnum khua mua djŏp gưl, biă ñu lĕ gưl prong, ƀơi djŏp anom bruă Ping gah, Kơnuk kơna, Khua mua pơ ala mơnuih ƀôn sang dêh čar hăng pơbưp mơnuih ƀôn sang đah mơ̆ng ngă kjăp tui hloh tơlơi đăo kơnang kơđi čar hăng thâo hluh nao rai tơdruă, ngă atur či pok prong tơlơi ngă hrŏm dua bơnah amăng djŏp bruă. Khua git gai pơ ala mơnuih ƀôn sang dêh čar Hungary pơsit, Việt Nam jing dêh čar ngă gŏp yôm mơ̆ng Hungary ƀơi kual ASEAN. Khua mua pơ ala mơnuih ƀôn sang dêh čar Hungary lêng kơ gir jing sa gong tơmeh phun amăng tơlơi rô nao rai ngă hrŏm dua boh dêh čar.