Tui hăng tơlơi lăi pơthâo, mơ̆ng akŏ thun truh kơ ră anai, Dak Lăk hơmâo giăm 4.200 čô mơnuih duam đung drah, đĭ giăm 40% pơhmu hăng tơđar thun 2025. Lăp đing nao, tơring čar hơmâo mơnuih djai blung a yua duam đung drah amăng thun anai ƀơi phường Tân An.

Tơlơi bơngơ̆t hloh lĕ năng blung a, duam đung drah kar kăi hăng duam đôč đač mơn. Ƀing čơđai ñu pơ-iă drơi, ƀu-ai, hia, pơkêt, ƀu mơhao ƀong huă, anun jing sang anŏ ƀu pơmin ruă kơtang hơget ôh. Khă hnun, lơ̆m truh hrơi hŭi rơhyưt, tơlơi ruă anai ñu kơtang hmar biă mă, pô ruă duam kraih, nur drah, kian pruăi ruă abih. Ơi ia jrao kơhnâo CKII Đặng Việt Nam, Pơjrao ƀing čơđai, Sang ia jrao prong Dap Kơdư pơtă hlâo: “Ƀing čơđai mơ̆ hơmâo tơlơi ruă hơđăp, drơi jăn ƀu-ai buai, hơmâo tơlơi ruă lok nao lok rai, ƀu thâo hlao ôh, jing kiăng krăo lăng, wai lăng klă, tap năng ba nao pơ sang ia jrao tañ hloh kơ pô pơkŏn. Pơhmutu čơđai rơmong plin, čơđai ruă boh ƀleh glăk mơñum ia jrao pơgang klin kman...Anai jing mơnuih drơi jăn ƀu-ai, ƀu anăm bong tơlơi ruă ôh, yua hnun lơ̆m ruă amuñ ruă kơtang biă mă. Ƀudah čơđai ñu rơwang akhen, čơđai pơtuk hơngơ̆t, huă amăng suă pran, ruă hơtai boh mơ̆ng nge...Tơdah thâo laih ruă duam đung drah kiăng nao pơ sang ia jrao mơtăm”.

Ƀơi anăp tơlơi hŭi rơhyưt mơ̆ng tơlơi ruă duam đung drah, Jơnum min mơnuih ƀôn sang tơring čar Dak Lăk kiăng hơdôm gơnong bruă, hăng gong gai ƀon lan pơphun pơgang, ƀu dưi klin lar hyu prong hăng sui ôh.

Gơnong bruă ia jrao hơmâo jao ngă anih krăo lăng, pơhŭi hlâo djŏp tơlơi truh; git gai Anom bruă wai pơgang klin duam ruă tơring čar, ngă hrŏm hăng hơdôm boh tơring pơgang, pruih jrao pơdjai kman, mač, laih anun pruih jrao pơdjai ană keč ƀơi hơdôm anih amuñ hơmâo klin. Hơdôm boh sang ia jrao pơkă hăng pơjrao khŏm prăp lui djŏp mơnuih mă bruă, ia jrao, gơnam yua, sưng đih, rơguăt tui bruă pơjrao, đah mơ̆ng plai ƀiă hơmâo mơnuih ruă kơtang hăng djai brŭ.

Hrŏm hăng anom bruă ia jrao, hơdôm gơnong bruă, khul grup, hăng gong gai kiăng hyu pôr pơthâo, iâu pơthưr mơnuih ƀôn sang rơmet rơmot sang anŏ, anih dŏ, lan sang, glŏm hĭ kơthung ia, get kơčai ƀu yua, pơdjai ană keč, kman, mač, aset biă ñu ha wơ̆t hrơi tơjuh sa wơ̆t ƀơi anih mă bruă, sang hră, anih pơkra gơnam, sĭ mơdrô hăng amăng plơi pla.

Hơdôm boh să, phường gơgrong bruă pơgang klin kman amăng plơi pla; lăng glăi anih pơpă amuñ hơmâo klin hloh, pơjrao brơi tañ mơnuih ruă, anih hơmâo klin, hăng jak iâu abih bang gum pơgang.

Duam đung drah ƀu djơ̆ leng kơ ƀuh rơđah rơđông ôh. Yua hnun, rơngiao kơ tơlơi gum djru mơ̆ng anom apăn bruă, sang ia jrao, bruă mơnuih ƀon sang hlâo kih tơmet, pơagaih sang anŏ, rơmet set anih hơmâo keč dŏ, pơgang hŭi keč kĕ laih anun ba čơđai nao pơkă lăng tañ lơ̆m duam ruă jing bruă ngă klă hloh đah mơ̆ng dưi pơgang, hŭi kơ ruă kraih laih anun plai ƀiă klin lar hyu./.