Không phang, pơ-iă kơtang amăng sui hrơi tui ră anai glăk ngă hơdôm kual glai rưng amăng tơring čar Kon Tum amuñ ƀuh apui ƀong. Amăng tơring čar hơmâo ƀuh sa, dua boh apui ƀong glai ngă 2 čô mơnuih djai. Ră anai mơnuih ƀon sang, ƀing wai lăng glai, anom bruă bơdjơ̆ nao ƀơi tơring čar Kon Tum glăk gơgrong pơgang hŭi apui ƀong glai. Tui tơlơi pơhing mơng anom bruă wai lăng glai rưng tơring čar Kon Tum brơi ƀuh hơmâo laih 8/10 boh tơring glông, plơi prong amăng tơring car dong amăng kual pơhŭi hlâo amra ƀuh apui ƀong glai gưl V- gưl hŭi rơhyưt hloh.

Ƀơi hơdôm boh tơring glông gah yŭ amăng tơring čar anun lĕ: Ia H’Drai, Sa Thầy, Đắk Tô, Ngọc Hồi, hơmâo giăm 230.000 ektar glai rưng amuñ ƀuh apui ƀong. Anom bruă wai lăng glai rưng tơring čar Kon Tum brơi thâo, hrŏm hăng bruă pơgang hŭi apui ƀong glai, Jơnum min mơnuih ƀon sang tơring čar ăt pơgiong hơdôm tơlơi pơkă kiăng mut hrŏm amăng bruă pơgang hŭi apui ƀong glai. Ƀơi anăp kơ ayuh hyiăng glăk pơ-iă kơtang, không phang dŏ sui pơ anăp amra ƀuh apui ƀong glai, mơnuih ƀon sang, ƀing wai lăng glai, anom bruă bơdjơ̆ nao hăng gong gai djop gưl amăng tơring čar Kon Tum glăk gơgrong pơgang hŭi apui ƀong.