Anai lĕ hơjan hlâo rah lơ̆m aka ƀu truh bơyan hơjan ôh, ngă adai rơ-ơ̆ plai ƀiă pơ-iă hang. Hơdôm boh tơring mơ̆ng Kon Tum tlam hăng mơmot hơmâo hơjan anun lĕ: Đăk Glei, Ngọc Hồi, Tu Mơ Rông, Đăk Tô, Sa Thầy, Đăk Hà, Kon Braih hăng plơi prong Kon Tum. Ơi Nguyễn Văn Huy, Khua anom bruă pơkă lăng ayuh hyiăng lŏn adai tơring čar Kon Tum brơi thâo, hơjan hlâo rah tal anai hơmâo mơ̆ng 5-15mm. Anai jing hơjan yôm biă mă, ngă plai ƀiă pơ-iă hang, không phang.

Hlâo kơ anun, lơ 24/3, ƀơi dua boh tơring glông Kon Plong hăng Đăk Glei ăt hơmâo hơjan mơn. Khă hnun, anai lĕ hơjan ƀu djơ̆ bơyan ôh. Tơlơi lăi pơthâo mơ̆ng Anom bruă pơkă ayuh hyiăng lŏn adai tơring čar Kon Tum brơi thâo, hơjan hlâo rah tal anai mơ̆ng tơring čar Kon Tum kaih hloh pơhmu hăng thun hlâo sa blan, bơyan hơjan thun 2024 hơmâo pơsit amra kaih mơn.