Ƀơi anăp kơ tơlơi anai, lu anom bruă pơgang glai amăng tơring čar hơmâo jao ngă bruă dŏ wai pơgang hrơi mlam hŭi apui ƀong glai. Tơlơi pơhing mơ̆ng anom bruă khua tơhan pơgang glai tơring čar brơi ƀuh, amăng hơdôm tơring glông Ia Hdrai, Sa Thầy, Đak Tô, Ngọc Hồi, Đak Hà, Kon Braih, Đak Glei, Tu Mrông hăng plơi prong Kon Tum rơnoh pơhŭi hlâo apui ƀong truh mrô V, jing rơnoh hŭi hloh, apui amra jă ƀu dưi thâo hlâo ôh.

Ơi Nguyễn Văn Nam, Khua anom bruă  tơhan pơgang glai tơring čar Kon Tum brơi thâo, kiăng pơgăn apui ƀong glai, 14 boh sang bruă tơhan hăng pô pơgang glai, hơmâo 7 boh kông ty, 7 khul ngă bruă pơgang glai, giăm plơi pla hăng glai kmrơ̆ng kơpal hrŏm hăng gong gai kơnuk kơna 10 boh tơring glông, plơi prong kơtưn jao ƀing tơhan mă bruă ĕp lăng pơgang re se anih mut tơbiă nao amăng glai hăng anih či hơmâo apui jă yua giăm plơi pla ƀudah hmua pơdai.