Ƀơi anăp kơ tơlơi soh sat arăng koh drôm, uă kyâo ča čot, tơlơi hŭi apui ƀong glai mơ̆ng akŏ blan 3 truh ră anai hơmâo na nao đôč, Jơnum min mơnuih ƀôn sang tơring čar Kon Tum lơ 17/3 hơmâo pơtrun hiăp djop anom bruă, tơring glông plơi pla kơtưn bruă git gai wai lăng, pơgang rưng hŭi apui ƀong glai. Tui hăng anun, Jơnum min mơnuih ƀôn sang tơring čar Kon Tum pơtrun hiăp kơ Gơnong bruă Đang hmua hăng Pơđĭ kyar plơi pla akŏ pơjing lu grup hyu sem lăng, wai pơgang hŭi apui ƀong glai amăng bơyan phang ƀơi djop plơi pla, boh nik ñu ƀơi anih phun, hŭi hơmâo apui jă, kiăng tañ ƀuh hmao hơprah thăm mơtam tơdah hơmâo apui ƀong glai; pơtô lăi, pơtă pơtăn, pơčrâo brơi djop sang bruă, khul mơnuih ngă tui tơpă, khut khăt bruă wai pơgang glai rưng hŭi apui ƀong.

Hăng djop tơring glông, plơi prong pô glai, hăng djop sang bruă wai lăng glai rưng ngă tui djơ̆ bruă pơgang kyâo glai hăng pơhlôm pơgang apui ƀong glai; dăp mơnuih mă bruă, djru ngă bruă  hyu tir na nao pơgang glai djơ̆ tơlơi phiăn, biă mă ñu ƀơi anih amuñ apui ƀong glai kiăng ƀuh hăng pơgăn mơtam.