Yap truh lơ 6/3, mrô ia mơ̆ng 172 bôh dơnao kŏng ia, bơnư̆ bư̆ ia ƀơi tơring čar Kon Tum ăt dô̆ mơn năng ai ñu mơ̆ng 50-70% mrô ia. Amăng 20 bôh dơnao ia kŏng prong mơ̆ng tơring čar kah hăng: Đak Uy, Đak Yên, Đak Rơn Ga... ia ăt dô̆ lu mơn. Tui tơlơi jŭ yap, ia mơ̆ng hơdôm bôh dơnao ia amra pơhlôm kơ đang hmua bơyan puih. Khă hnun hai, tơring čar Kon Tum ƀu dưi lui raih ôh, glăk ngă tui lu jơlan pơsir kiăng pơhlôm ia kơ phun pla amăng hơdôm blan rơnuč bơyan phang.

Bơyan puih phang thun anai đơ đam tơring čar Kon Tum rah pla giăm hmâo 7.000 ektar hmua pơdai, giăm truh 5.000 ektar đang kơtor hăng rơbêh kơ 1.000 ektar đang añăm pơtăm djop mơta. Hrŏm hăng pơhlôm ia yua kơ đang hmua, gơnong bruă đang hmua tơring čar Kon Tum ăt khom pơhlôm mơn ia yua kơ hơdôm pluh rơbâo ektar đang phun pla sui thun hăng phun bôh troh./.