Amăng hơdôm hrơi khŏt ia kơtang hloh amăng bơyan phang ƀơi kual Dap kơdư, hmua pơdai ia hăng đơ đam rơbêh 11 ektar mơng mơnuih ƀon sang plơi Gia Xiêng, să Rờ Kơi, tơring glông Sa Thầy, tơring čar Kon Tum ăt mơtah mơda mơng hmua pơdai ia bơyan puih phang. Ayong A Thun, Khua plơi Gia Xiêng brơi thâo, hmua pơdai gơnang nao ia mơng dơnao pơkŏng ia Đăk Hlang. Kiăng bong glăi không phang khŏt ia lĕ kiăng yua ia pơkrem hăng tŭ yua hloh:

“Amăng hơdôm hrơi anai hmua pơdai ƀơi plơi Gia Xiêng ia ăt pơhlôm djop mơn. Kâo pô amăng hơdôm hrơi jơnum amăng plơi pla ăt pơtô pơblang brơi neh met wa mă ia brơi lăp djơ̆. Kiăng pơđoh ia brơi kơ gap ƀrô. Kâo pô ăt hyu lăng na nao ƀơi hơdôm čroh ia, pơtrut pơsur neh met wa hyu rơmet pơagaih amăng djop čroh ia amăng bơyan puih phang anai”.

Hrŏm hăng bruă yua ia thâo pơkrem hăng tŭ yua, kiăng kơ plai ƀiă hơdôm anŏ răm rai mơng hmua pơdai ia amăng bơyan puih phang lơ̆m khŏt ia amăng rơnuč bơyan không phang ƀơi hơdôm boh să anun lĕ: Sa Nghĩa, Sa Bình, Ya Ly…tơring glông Sa Thầy, hơdôm rơtuh boh sang anŏ hơdai nao pla kơtor, hơbơi plum, añăm tam…plih hĭ ngă hmua pơdai ia. Sang anŏ hơmâo 5 ar hmua pơdai ia, ơi Phan Lương, dŏ amăng plơi Hoà Bình, să Sa Thầy brơi thâo, kiăng pơsir hĭ bruă kơƀah ia bơyan puih phang, hơdôm thun anai sang anŏ ñu hơdai nao pla kơtor amăng 3 ar, pơhrui glăi hơmâo hmăi ƀiă pơhmu hăng ngă hmua pơdai ia:

“Pla kơtor pơhmu hăng ngă hmua pơdai ia pla ƀiă glêh glar yua ngă hmua pơdai ia kiăng nao lăng rĭm hrơi, biă mă ñu amăng bơyan puih phang kiăng pơđoh pơmut ia. Bơ phun kơtor 10 hrơi kah mơng nao lăng ha wŏt. Bruă tal dua lĕ amuñ ƀiă, phun pla huăi ƀuh hlăt mŏt pơčram. Pơhmutu kman ƀong peñ hla ƀuh aset ƀiă. Hơmâo lu gơnam pơhrui, dua dong lĕ đuh arăng ngă chả ram. Sa tơlơi dong lĕ sĭ phun dong, 1.000 m2 kơnong sĭ phun giăm 1 klăk prăk. Pla kơtor pơhmu hăng ngă pơdai ia amuñ giăm dua wŏt”.

Tơring glông Sa Thầy lĕ sa amăng hơdôm anih không phang kơtang hloh amăng tơring čar Kon Tum, rĭm thun truh bơyan không phang kơƀah ia pruih brơi phun pla, biă mă ñu amăng bơyan ngă hmua pơdai ia puih phang. Đa hơmâo thun không amăng sui hrơi, mơnuih ƀon sang amăng hơdôm tơring glông rơngiă hĭ hơdôm pluh ektar hmua pơdai. Ơi Giả Tấn Đạt, Khua anom bruă ngă hmua hăng pơđĭ kyar ƀon lan tơring glông Sa Thầy brơi thâo, yua ngă ha amăng plĕ hơdôm hơdră bong glăi ayuh hyiăng không phang yua anun tơring glông plai ƀiă anŏ răm rai amăng bruă ngă đang hmua:

“Hăng hơdôm hmua ƀu hơmâo dơnao pơkŏng ia amăng bơyan ngă đang hmua, sit biă ñu pơplih phun pla ƀiă hrơi. Sa, dua kual ƀu pơhlôm djop ia pơkŏng glăi hơdai nao pla añăm tam, kơtor hăng sa, dua phun pla pơkŏn. Hrŏm hăng anun bruă pơtô pơblang, git gai hơdôm boh să, tơring kual mă yua rơnoh prăk ngă hmua kiăng hyu rơmet pơagaih čroh ia, anăm brơi ia ram tơbiă mơng dơnao. Gum hrŏm hăng hơdôm anom bruă wai lăng dơnao pơkŏng ia kiăng pơđoh hyu ia gap ƀrô hăng pơtô pơblang brơi mơnuih ƀon sang thâo pơkrem ia yua./.