Lơ 18/5, ƀơi plơi prong Kon Tum, Khul apăn bruă Ping gah tơring čar Kon Tum pơphun jơnum lăng glăi 2 thun ngă tui tơlơi klah čun mrô 01 mơng Ding jum kơđi čar kơ “Pơtrut hrăm hăng ngă tui tơlơi pơmĭn, gru hơdip hăng bruă mă mơng Hồ Chí Minh”, laih dong pơpŭ bơni hơdôm khul grup, ƀing mơnuih ba gru amăng bruă hrăm hăng ngă tui gru hơdip mơng wa Hô. 2 thun laih rơgao tơring čar Kon Tum hơmâo pơjing giăm 1.300 hơbô bruă klă, ba glăi tŭ yua amăng bruă hrăm, ngă tui gru hơdip mơng wa Hô. Pơhmutu lĕ hơbô̆ bruă “Jua teng hrăm tui”, “Sang hră yâo mơ-ak” mơng gơnong bruă pơtô pơjuăt, “Hrơi tal 5 anăp nao ƀon lan” mơng Ping gah tơring glông Đăk Glei, “Kơthung braih khăp pap” mơng Ping gah tơring glông Ngọc Hồi…

Bruă pơtrut hrăm hăng ngă tui gru hơdip mơng wa Hô hơmâo pơgôp hrăm đĭ tơlơi pơmĭn, bruă mă mơng djop gưl, khul grup Ping gah, anom bruă amăng ngă tui bruă jao kơđi čar; pơplih bruă mă mơng khul apăn bruă kiăng jai hrơi klă, tŭ yua dong. Amăng mông jơnum, Khul apăn bruă Ping gah tơring čar Kon Tum rơkâo djop gưl, hrưn đĭ klă dong kiăng bruă hrăm hăng ngă tui gru hơdip mơng wa Hô jing tơlơi pơmĭn gơgrong mă pô, bruă mă tŏ tui na nao mơng rĭm čô mơnuih apăn bruă Ping gah, mơnuih mă bruă…

Amăng jơnum hơmâo 21 khul grup hăng 30 čô mơnuih hơmâo tŭ mă hră mơ-it pơpŭ bơni mơng Khua git gai Ping gah tơring čar Kon Tum; 19 khul grup hăng 26 čô mơnuih hơmâo Jơnum min mơnuih ƀon sang tơring čar Kon Tum ƀơk hră pơpŭ bơni.