Mơ̆ng lơ 1/3, bruă mă jao phrâo hăng pơblih ngă brơi hră pơgăt rơdêh, jao glăi mơ̆ng Gơnong bruă Jơlan glông hăng pơdŭ pơgiăng, ră anai lĕ Gơnong bruă man pơdong, brơi tơlơi dưi kơ anom bruă kông tơhan kông an tơring čar.

Ƀơi Dak Lak tơdơi kơ 20 hrơi pok pơhai, anom bruă kông an tơring čar hơmâo tŭ mă hăng pơsir rơbêh 1.500 pok hră ngă brơi phrâo hăng pơblih hră pơgăt rơdêh kơ mơnuih ƀôn sang.

Plah wah blan 2/2025, kông an Dak Lak git gai Anom bruă tơhan pơlih jơlan glông, kông an să, phường ngă hrŏm Gơnong bruă Man pơdong jơnum bơjao glăi bruă mă, tŭ mă gơnam yua mă bruă, măi mok, rơdêh djop mơta hăng bruă mă pơphun pơplông mă hră mơgăt rơdêh. Laih dơ̆ng, pơphun ĕp glăi djop mơta gơnam yua, anih hrăm mơgăt, pơplông mơgăt rơdêg mơ̆ng Gơnong bruă Man pơdong jao glăi hăng 3 boh sang hră hrăm mơgăt rơdêh amăng tơring čar dơ̆ng mơ̆ng lơ 1/3. Tơdơi kơ 20 hrơi ngă tui, truh ră anai, kông an să, phường hơmâo tŭ mă 248 pok hră, anom bruă tơhan pơlih jơlan glông hơmâo tŭ mă giăm 1.300 pok hră hăng ngă giong bruă pơblih hră mơgăt rơdêh kơ 1000 čô mơnuih hơmâo ră mơgăt rơdêh phrâo.