Tơdơi kơ prap lui hơdôm gơnam đơđet hăng adung bak brơi ƀing čơđai hăng djop ia iom, thiếu tá Lại Văn Đạt mơgăt rơdêh ba ƀing gơmơi mut tơl plơi pla. Yua kơ thâo ƀing gơmơi ăt mơnuih Jarai, anun ñu pơhiăp hăng tơlơi Jarai mơtăm. “Hrơi anai, ƀing ta glăi pơ plơi Ksing. Anai lĕ plơi pla kâo dŏ hơdip mơng dŏ anet. Neh met wa djuai ania Jarai pơ anai hơdip jê̆ giăm hăng bă pran khăp pap; mah tơlơi hơdip kơ lu sang anŏ dŏ tơnap tap”.

Tơkeng rai hăng hơdip truh prong amăng kual lŏn anai, thiếu tá Lại Văn Đạt hơmâo tơlơi gal mơn lơm ñu dŏ hơdip hăng mơnuih djuai ania Jarai mơng dŏ anet. Lơm ngă bruă, ñu juăt nao pơbưp, pơtô pơblang, pơtrut pơsur, ñu tŏ tui kiăo tui hrăm tơlơi Jarai kiăng kơ thâo lu ƀiă dong.

Rĭm wŏt glăi pơ plơi pla, thiếu tá Đạt hăng ƀing gŏp ăt djă ba lu gơnam ƀơk brơi čơđai. Anai lĕ hơdôm adung hră ƀơk brơi ƀing čơđai sang anŏ tơnap tap. Mơng tơlơi jak iâu hăng mơnuih amăng sang anŏ, gơyut gơyâo hăng Khul ia jrao kyâo bơrơkal mriah să, 500 adung dră hơmâo ƀơk brơi ƀing čơđai hlâo kơ thun hrăm phrâo. Amăng anun, hơmâo amon Ksor H’Yang dŏ amăng plơi Ksing, ñu lĕ čơđai drit druai, glăk dŏ hơdip hrŏm ơi ñu Siu Got: “Kâo pô khăp biă mă kơ kăn ƀô̆ Đạt. Ñu lĕ mơnuih hơdip jê̆ giăm, thâo djru brơi ƀing čơđai tơnap tap kar hăng ană amon gơmơi anai. Hlâo kơ hrơi mut sang hră, sang anŏ ƀing čơđai ƀơi anai lu tơnap tap, samơ̆ yua hơmâo tơlơi djru ba hmao tlôn mơng kăn ƀô̆ Đạt hăng hơdôm adung hră laih dong gơnam yua pơkŏn, ngă kơ ƀing čơđai hur har hok mơ-ak biă mă.”

Tơlơi kơđŏm glăi mơng mơnuih ƀôn sang hăng thiếu tá Lại Văn Đạt ƀu djơ̆ kơnong lĕ gơnam ƀơk đôč ôh mơ̆ ăt lĕ tơlơi đing nao djru ba, jê̆ giăm. Thun 2021, amăng sa wŏt ngă bruă jao lơm kman Covid-19 hơđuh đĭ, thiếu tá Đạt hrŏm hăng grup hyu mă bruă ƀuh sa čô đah kơmơi pi kian ƀiă tơkeng laih. Ƀu pơmĭn hơget ôh, ñu hrŏm hăng ƀing gŏp ba pô đah kơmơi anai nao pơ sang ia jrao să Phú Thiện. Anun dua amĭ ană ñu lêng rơnuk rơnua. thiếu tá Đạt pơanăn brơi čơđai anai lĕ Hạ Vy, hăng tơlơi čang rơmang “pơgang hĭ cô-vit”. Amĭ Em, yă kơ amon Hạ Vy brơi thâo, thun anai Hạ Vy mut hrăm sang hră čơđai muai, ñu ăt hơmâo kăn ƀô̆ Đạt ƀơk brơi sa adung hră. “Abih bang mơnuih lêng kơ thâo ayong Đạt anai, yua hlâo anun ñu dŏ hơdip amăng plơi mơn hăng ñu lĕ ană amĭ Biên. Rĭm wŏt glăi pơ plơi pla, ñu juăt djă ba adung hră kiăng ƀơk brơi ƀing čơđai sang hră. Amăng anun hơmâo čơđai anet ñu djru brơi anun lĕ Hạ Vy. Anai lĕ sa bruă mă yôm phăn hăng lăp djơ̆. Truh ră anai, ñu ăt tŏ tui hơmâo lu bruă djru ba, ƀơk brơi gơnam yua hrăm hră brơi ƀing čơđai”.

Mơng hơdôm tal glăi pơ plơi pla, thiếu tá Lại Văn Đạt hơmâo pok plang facebook hăng anăn “Công an về làng”, dar mă rup ƀing apăn bruă, ling tơhan glăi pơ plơi pla, bơră ruai hrŏm neh met wa, ĕp lăng tơlơi hơdip hăng djru brơi mơnuih ƀôn sang. Tơdơi kơ giăm tlâo wŏt hrơi tơjuh, hơmâo giăm 60 clip hơmâo pơƀuh brơi, pơhưč giăm 9.000 čô mơnuih kiăo tui lăng. Sa clip hơmâo giăm 500 rơbâo čô mơnuih lăng. Thiếu tá Lại Văn Đạt brơi thâo, rup rap sa čô tơhan kông ang jê̆ giăm mơnuih ƀôn sang. dŏ hrŏm, pơhiăp tom mơnuih ƀôn sang, đing tơngia hmư̆ mơnuih ƀôn sang djru ba mơnuih ƀôn sang. “Tơhan kông ang gơmơi hơmâo “6 tơlơi wa Hô pơtô kông ang mơnuih ƀôn sang”. Amăng anun, rơkâo ƀing gơmơi kiăng lăng yôm hăng pơpŭ brơi mơnuih ƀôn sang, akĕ phĭ tui Ping gah, Kơnuk kơna; hăng mơnuih ƀôn sang, ƀing gơmơi kiăng lăng yôm, luăi gŭ. Anai ăt lĕ bruă ngă tui tong ten hơdôm tơlơi pơtô mơng Wa, kah kah hăng tơlơi pơplông “Tlâo klă hloh” mơng Ding jum kông ang, amăng anun hơmâo “giăm mơnuih ƀôn sang hloh”.

Gum hrŏm hăng hơbô̆ bruă “Công an về làng” lĕ sa čô đah kơmơi anăn Jarai Rahlan Wĩ, dŏ amăng plơi Kte Prong A, să Phú Thiện, tơring čar Gia Lai. Anai lĕ sa amăng ƀing mơnuih juăt dar mă video hăng hơdôm klăk čô mơnuih kiăo tui lăng amăng plơi pla, Rah Lan Wĩ djru brơi Lại Văn Đạt dar mă rup rap sit nik, tong ten djop mơta amăng plơi pla: “Ayong Đạt lĕ sa čô tơhan kông ang jê̆ giăm neh met wa kiăng pơtô pơblang, pơtrut pơsur mơnuih ƀôn sang ngă tui tơlơi črâo trun, hơdră bruă mơng Ping gah hăng Kơnuk kơna. Lơm hyu ngă bruă, ayong Đạt lêng kơ hrăm tui tơlơi Jarai kiăng dưi pơhiăp hăng neh met wa. Rĭm wŏt glăi pơ plơi pla, neh met wa kiăng khăp biă mă kơ ayong Đạt; nao truh hơpă, neh met wa lêng kơ pĕ hla hơpluh brơi ñu djă glăi. Yua mơng tơlơi gir run kiăo tui hrăm tơlơi Jarai yua anun ayong Đạt thâo tơlơi čang rơmang mơng neh met wa”.

Mơng hơdôm bruă mă jê̆ giăm hăng mơnuih ƀôn sang, thiếu ta Lại Văn Đạt hăng ƀing gŏp tơhan kông ang să Phú Thiện, tơring čar Gia Lai glăk ngă tui tơlơi mơ̆ Wa Hô pơtô brơi tơhan kông ang: luăi gŭ mơnuih ƀôn sang, jê̆ giăm hăng mơnuih ƀôn sang. Hrăm tui boh pơhiăp mơnuih ƀôn sang, glăi pơ plơi pla, đing tơngia hmư̆ hăng djru brơi neh met wa, kiăng rup rap tơhan kông ang jai hrơi jê̆ giăm mơnuih ƀôn sang, thâo hluh mơnuih ƀôn sang hăng yua kơ mơnuih ƀôn sang ngă bruă./.