Hơdôm kông ngăn mơ̆ng Wa pioh glăi djă pioh rơnoh yôm dlăm biă mă, kah hăng jơlah apui arôk pơčrang jơlan, bang bơngač rơnoh yôm djuai ania hăng rơnuk phrâo. Ƀơi anăp kơ lŏn ia arăng sua mă kơtư̆ juă, mơnuih mơnam pơčlah člap, dŏ lăng tơlơi tơnap tap răm ƀăm yua kơ ƀing ayăt ƀrưh hmiah ngă sat, rơnuk khua mua pơtao pơtung wai lăng, tơlơi rơngôt hning đut tơhnal mơ̆ng mơnuih ƀôn sang mă bruă amăng dêh čar, sa čô tơdăm phrâo yuh hơmâo pran jua khăp kơ lŏn ia, djuai ania anăn Nguyễn Tất Thành pơsit pran jua đuăi nao pơ dêh čar tač rơngiao ĕp jơlan pơklaih rơngai djuai ania “Amra pơwơ̆t glăi djru ană plơi” amăng bruă tơgŭ hơkrŭ blah rơngai, sua glăi lŏn ia kơ djuai ania, tơlơi rơngai, tơlơi mơak kơ mơnuih ƀôn sang dêh čar.

Thun 1941, tơdơi kơ 30 thun đuăi hyu djop dêh čar ĕp jơlan hơkrŭ, Wa Hồ pơwơ̆t glăi pơ dêh čar ta pô khăp ƀu–eng, git gai phung hơkrŭ ngă bruă djă bưng bôt gru phun mơ̆ng Ping gah ta, sua glăi tơlơi rơngai kơ lŏn ia, tơlơi mơak mơai kơ mơnuih ƀôn sang. Tơl mông gêh găl truh laih, Wa git gai tal tơgŭ hơkrŭ Blan čơpăn tŭ yua, ngă pơblih lu tơlơi hơdip bưng bôt mơnuih ƀôn sang Việt Nam, djuai ania Việt Nam ta. Ñu arăng lăng kah hăng gru rup rap anŏ kiăng rơnuk rơnua, tơlơi khăp giăng mah hăng ngă hrom gơyut gơyâo kơ djuai ania ta. Kơ-iăng nai tha prin, nai prin tha ơi Bùi Đình Phong, sang hră kơđi čar dêh čar Hồ Chí Minh pơblang glăi:

“Bruă mă mơ̆ng Hồ Chí Minh, hơdră Hồ Chí Minh lăng, kơnuih Hồ Chí Minh, tơlơi pơmin Hồ Chí Minh brơi ƀuh: Hồ Chí Minh mă yua gru grua hiam kah hăng sa mơta ia ƀlit, hrĕ mrai akă kjăp djop djuai ania ƀudah pơtruh brơi djop djuai ania, lŏm lui hĭ anŏ pleh ploh. Tơl mơnuih dêh čar Prang, mơnuih dêh čar Mi rai blah mơkang wang plơi dêh čar ta, sua mă lŏn ia ta hai, Wa ăt lăi lĕ: Rai sua lĕ ta khom blah glăi, samơ̆ drah hơgĕt lĕ ăt drah mơ̆n, ană mơnuih pơpă hai ăt jing ană mơnuih mơ̆n. Ñu pơyôm biă mă bưng bôt djuai ania Việt Nam ăt kah hăng pơyôm mơ̆n tơlơi hơdip mơnuih djuai ania Prang ƀudah Mi”.

Hơdôm tơlơi pơmin mơ̆ng Wa lăi nao kơ ia phun čơkô̆, anŏ hiam amăng lăm adih, tơhnal pơtrun, pran kơtang...hăng hơdôm tơlơi ngă djơ̆ găl phiăn pơtrun akŏ pơdong jơlan hơdră chủ nghĩa xã hội jing djop mơnuih mơnam ngă khua pô, kiăo tui tong ten jơlan hơdră rơngai djuai ania hăng jơlan hơdră mơnuih mơnam bơkơnar kah hăng hrĕ mrai mriah, anŏ gêh găl ngă tui tŭ yua bruă mă akŏ pơdong hăng pơgang Lŏn ia. Nai prin tha ơi Lê Trung Kiên, Anom kơsem min Hồ Chí Minh hăng khua mua ping gah dêh čar ta lăi:

“Kông ngăn prong kjăp mơ̆ng Khua mir sir Hồ Chí Minh pioh glăi hăng djuai ania hăng rơnuk phrâo, ƀuh rơđah hăng tŭ yua kơ lŏn ia jing sa tơhnal pơkă ruah mă, hơduah ƀuh, akŏ pơjing laih anun akŏ pơjing jơlan rơngai djuai ania lir hơbit hăng mơnuih mơnam bơkơnar ƀơi Việt Nam. Biă mă ñu amăng bruă pơblih phrâo ră anai ƀơi lŏn ia ta hăng kông ngăn Hồ Chí Minh pioh pơƀuh rơđah hơdôm gru atur tơlơi pơmin, tơlơi kiăng,  anŏ hơmâo ngă tui laih mơ̆ng Wa črâo brơi anun lĕ jơlan hơdră pơblih phrâo djru ngă giong tơlơi pơtô djơ̆ jơlan hơdră pơblih phrâo mơ̆ng Ping gah Cộng sản Việt Nam ta ră anai”.

Bruă hơkrŭ mơ̆ng Khua mir sir Hồ Chí Minh anih pơphun hăng pơđut lêng kơ anăp nao bruă pơklaih rơngai brơi ană mơnuih, pơsir brơi tơlơi hyuk hyak mơak klă kơ ană mơnuih. Kông ngăn Hồ Chí Minh kơ bruă akŏ pơdong hăng pơđĭ kyar bơwih ƀong huă, ƀu pơdơi ôh pơđĭ tui tơlơi hơdip mơnong ƀong huă hăng tơlơi mơak pran jua kơ mơnuih ƀôn sang, blung hlâo kơ ƀing mă bruă, mơnuih ƀôn sang mă bruă. Ñu ăt pioh glăi kơ rơnuk tơdơi rơnoh yôm kông ngăn akŏ pơdong Ping gah ta juăt lăi Đảng hăng glông bruă kơđi čar pioh ngă tui hăng pơđĭ kyar thâo pơčeh phrâo djơ̆ găl hăng anŏ phun kiăng mơ̆ng djuai ania hăng rơnuk phrâo. Tui hăng Nai tha prin, nai prin tha ơi Mạch Quang Thắng, amăng rơnuk anai kiăng biă mă ngă kjăp tui kah hăng drah kơtăk čơđeh asar tơlep hăng drơi jăn plah wah Ping gah hăng ană plơi pla:

“Ping gah mơ̆ng mơnuih ƀôn sang mơ̆n hơmâo. Jing ping gah lĕ ană mơnuih mơ̆ng mơnuih ƀôn sang đôč. Ping gah khom hơmâo bruă glăm ba ngă giong tơlơi bơwih glăi kah hăng thâo hơdor tơngia kơ amĭ ama ta pô anun lĕ mơnuih ƀôn sang. Khua mir sir Hồ Chí Minh lăi rơđah tong ten hloh lĕ, Ping gah jing ngă bruă kơ mơnuih ƀôn sang, ƀong prăk blan khom ngă bruă kơ mơnuih ƀôn sang. Tơlơi anai, amăng rơnuk hơkrŭ ră anai jai kraih yơh kiăng ngă kjăp hloh tơlơi jĕ giăm tui hăng tơlơi pơmin djơ̆ Hồ Chí Minh kiăng lĕ tơlơi pơtlep hrom drah kơtăk čơđeh asar kơplah wah Ping gah hăng ană plơi pla”.

Kơsem min, ba yua, pơđĭ kyar thâo pơčeh phrâo kông ngăn yôm mơ̆ng Hồ Chí Minh pioh ngă tui thâo hluh tong ten, djop djel hloh, dơlăm tui prong prin mơ̆ng Wa pioh glăi kơ djuai ania ta hăng mơnuih mơnam rŏng lŏn tơnah, laih dơ̆ng, ngă prong tui rơnoh yôm kông ngăn Hồ Chí Minh jai hrơi hơđong kjăp, bơngač bang hrom djuai ania hăng mơnuih ƀôn sang rŏng lŏn tơnah. Kjăp tơlơi pơmin, hơđong pran jua kiăo atur kông ngăn Hồ Chí Minh hơmâo pơjing rai, djuai ania Việt Nam amra ngă tui tŭ yua tơlơi čang rơmang mơ̆ng Ñu kơ “Bruă akŏ pơdong sa boh lŏn ia Việt Nam rơnuk rơnua, lir hơbit, rơngai, mơnuih ƀôn sang ngă pô, pơdrong asah hăng djru hrom amăng bruă hơkrŭ ƀơi rŏng lŏn tơnah”.