Mông lăi pơhing Bruă mă Mông bôh lŏn thun 2023 yua kơ Grŭp Sang bruă apui lơtrik Kon Tum pơphun ngă pơhư̆č rơbêh kơ 900 čô čơđai sang hră ƀơi Sang hră gưl sa, gưl 2 Đăk Bla, plơi prong Kon Tum. Tơlơi mơ-ak lĕ kah hăng abih bang hơdôm tơlơi tơña amăng črăn pơđăo mơ-ak hmâo apah bơni bơdjơ̆ nao truh tơlơi pơkrem apuih lơtrik, kah hăng: mă yua pơkrem apui lơtrik amăng anih hrăm, sang anô̆; thâo krăn măi pơkă rơnoh mă yua apui; ruah mă măi mok mă yua pơkrem apuih lơtrik... ƀing čơđai sang hră leng kơ lăi glăi djơ̆ hăng hmâo akô̆ tlôn dong. Adơi Chu Thị Thanh Tuyền, čơđai sang hră anih 9D, brơi thâo:

 “Tơdơi kơ jơlan hơdră anai hmâo thâo hluh rơđah hloh kơ bôh tŭ yua mơng Mông bôh lŏn pioh pơkrem apui pơgang anih anom dô̆ huăi pơplih ayuh hyiăng. Kâo hmâo hơdôm bruă mă kiăng pơkrem apui lơtrik bơhmutu ñu kah hăng ƀơi sang ƀudah pơ̆ sang lĕ pơdjai abih măi mok lơm ƀu hmâo mă yua truh, kah hăng tơbiă mơng anih hrăm pơdjai apui, pơdjai măi pưh hâ̆u, pơdjai tivi. Kâo čang rơmang hơdôm bruă ngă anet anun amra djru hrom pơgang anih anom dô̆ huăi pơplih ayuh hyiăng”.

Hăng bruă mă phun, gơnong bruă apui lơtrik Kon Tum hmâo laih lu hơdră lăi pơhing, pơsur giăm hăng mơnuih ƀôn sang. Thun anai pơsit mơnuih lăi pơhing lĕ ƀing čơđai sang hră, anom bruă gum hrom hăng sang hră pơphun hơdôm mông jơnum gah rơngiao kơ mông hrăm ƀơi sang hră kơ čơđai sang hră. Hrom hăng anun lĕ lăi pơhing hăng panô, áp phích, ƀăng rôn... hăng ƀơi plăng web, facebook, plăng fanpage. Anom bơwih ƀong sĭ mơdrô Sang bruă gum hrom hăng Khul hlăk ai pơhrua nao hrom ngă tui pơphun jơlan hơdră “Gum hrom adơi nao sang hră” pơkĕ hrom lăi pơhing bruă Mông bôh lŏn 2023. Rim bruă mă amăng jơlan hơdră leng kơ lar hyu tañ tơlơi pơhing “Pơkrem apui lơtrik – Jing tơlơi juăt”. Ơi Nguyễn Quang Hùng, Kơ-iăng Khua Sang bruă apui lơtrik Kon Tum brơi thâo, anom čang rơmang lar hyu tơhnal yôm phăn mơng bruă “Pơkrem apui lơtrik – jing tơlơi juăt” truh giăm hloh amăng mơnuih ƀôn sang, biă ñu ƀing čơđai sang hră. Mơng anun, lar hyu tơlơi pơhing anai truh sang anô̆, gơyut gơyâu, mơnuih amăng kơnung djuai hăng hloh kơ anun dong lĕ abih bang mơnuih mơnam. Hluai tui hơdôm bruă lăi pơhing, hmâo laih hơdôm tơlơi pơplih klă amăng tơlơi pơmin ăt kah hăng bruă mă amăng mơnuih ƀôn sang kơ mă yua apui lơtrik pơkrem kiăng pơgang pơgăn pơplih ayuh hyiăng:

 “Lăi pơhing pơkrem apui lơtrik ăt kah hăng anăp nao Mông bôh lŏn lĕ bruă ngă na nao. Sang bruă apui lơtrik Kon Tum kơsem min hơdôm hơdră, hơdôm bruă mă amuñ amĕ mut amăng tơlơi pơmin mơnuih ƀôn sang, hmâo lu jơlan hơdră pha ra ƀơi rim kual. Hơdôm bôh sang anô̆ mơnuih ƀôn sang ăt kah hăng hơdôm bôh anom bơwih ƀong ră anai lĕ ăt đing nao mơn bruă pơkrem apui lơtrik kiăng pơđĭ tui bôh tơhnal bruă mă mơng hơdôm bôh anom. Hăng hơdôm bôh sang anô̆ rơnoh thâo kơ pơkrem ăt dưi pơđĭ tui mơn”.

Hluai tui Bruă mông bôh lŏn 2023, mrô apui pơkrem mơng tơring čar Kon Tum lĕ 2.400 kWh. Tơlơi anai pơdah pran lar hyu tañ mơng hơdôm bruă mă amăng Bruă mông bôh lŏn thun 2023. Hăng tơlơi lăp mơ-ak lĕ bruă mă pơkrem apui lơtrik ƀu djơ̆ kơnong kơ pơdơi glăi ƀơi rơwang sa mông mơmŏt hrơi 7,  rơwang hrơi tơjuh rơnuč blan 3 rim thun pơphun Mông bôh lŏn ôh mơ̆, ñu dô̆ jing bruă mă na nao rim hrơi./.