Ơi Võ Văn Thưởng lĕ khua apăn bruă pơprong amăng Ping gah hăng Kơnuk kơna, hơmâo pơtô pơjuăt tong ten, đĭ rai dong mơng anih mă bruă ƀơi ƀon lan, hơmâo ruah ngă khua mua pơprong amăng Ping gah hăng Kơnuk kơna. Samơ̆, phrâo rơgao tui lăi pơthâo mơng Jơnum min pel ĕp gơnong glông hăng anom bruă bơdjơ̆ nao, ñu hơmâo ngă soh hăng tơlơi pơkă kơ sa čô mơnuih Ping gah ƀu dưi ngă, tơlơi pơkă lăi nao pran gơgrong mơng sa čô mơnuih apăn bruă Ping gah, blung hlâo lĕ Ding kơna Ding jum kơđi čar, Ding kơna Khul čih pioh, Ding kơna Khul apăn bruă Ping gah hăng tơlơi glăm ba mơng sa čô mơnuih apăn akŏ tui hơdôm tơlơi pơkă mơng Ping gah hăng tơlơi phiăn mơng kơnuk kơna. Hơdôm tơlơi ngă soh, aka ƀu klă mơng ơi Võ Văn Thưởng ngă lu mơnuih đing nao, bơdjơ̆ nao pran đăo gơnang  amăng Ping gah, Kơnuk kơna hăng ñu pô.

Thâo rơđah tơlơi glăm ba ƀơi anăp Ping gah, Kơnuk kơna hăng mơnuih ƀôn sang, ñu hơmâo mơ-it hră pơdơi apăn bruă. Hluai tui tơlơi pơkă ră anai mơng Ping gah, Kơnuk kơna hăng sem lăng tơlơi čang rơmang mơng ơi Võ Văn Thưởng, khul apăn bruă Ping gah tŭ ư brơi ơi Võ Văn Thưởng pơdơi ngă: Ding kơna Ding jum kơđi čar, Ding kơna Khul apăn bruă Ping gah tal XIII, Khua mir sir dêh čar Việt Nam, Khua khul wai pơgang rơnuk rơnua rơwang thun 2021-2026.