Kah hăng tơđar, rim krah bơyan phang kah hăng ră anai, rơdêh pơgiăng tơbâo glăi jưh jing glông amăng lan Sang măi pơkra sik An Khê, ƀudah Sang măi pơkra sik Ayun Pa, tơring čar Gia Lai. Samơ̆ pha ra hăng djop thun, thun anai hơdôm bôh rơdêh pơgiăng tơbâo lom nao pơ̆ hơdôm bôh sang măi anai leng kơ dưi jưh rơguăt biă. Ƀing pô rơdêh juăt laih hăng bruă dăp rơguăt, tơpă amăng kơthung rơdêh. Lu rơdêh pơgiăng lu gơnam hmâo pơgiăng djơ̆ rơnoh pơkă, kiăng pơhlôm ƀơi jơlan nao rai hmâo kual pla tơbâo mơng sang măi pơkra sik. Ơi Lương Tuấn Thông – Kơ-iăng Khua wai lăng bruă măi mok pơkra sik Sang măi pơkra sik Ayun Pa brơi thâo, thun anai tơlơi wai lăng rơnoh pơgiăng tơbâo ngă tui kơjăp mơng bruă ngă hră pơ-ar truh bruă wai lăng ƀơi jơlan nao rai. Kiăng djru hrom khul wai lăng bruă dŭ pơgiăng, bơnah gah sang măi pơkra sik hmâo laih hơdră bruă pơ ala brơi kơ prăk apah pơgiăng hăng hơdôm djuai rơdêh pơgiăng djơ̆ rơnoh pơkă.

 “Ră anai sang bruă pơtrun ngă tui tơlơi pơkă mơng tơlơi phiăn, hmâo lăi pơhing hăng hơdôm bôh rơdêh pơgiăng kiăng bruă pơgiăng pơhlôm djru bruă pơkra sik mơng sang măi. Sang bruă ăt gum hrom mơn hăng rơdêh pơgiăng, hăng hơdôm rơdêh pơgiăng 17 tơn (djơ̆ rơnoh pơkă) lĕ sang bruă amra pơ ala glăi 8% kiăng pơhlôm prăk pơhrui glăi kơ rơdêh pơgiăng kơ neh wa pla tơbâo. Hăng hơdôm bôh rơdêh pơgiăng rơgao hơnong pơkă lĕ sang bruă ƀu brơi pơgiăng mut ôh hăng ngă hră lăi pơdah”.

Tui hăng pô mơgăt rơdêh Nguyễn Đình Khang, mơnuih pơgiăng tơbâo lu thun hăng anai kơ hơdôm bôh sang măi pơkra sik ƀơi tơring čar Gia Lai, thun anai lu mơnuih mơgăt rơdêh ruah mă pơgiăng tơbâo đĭ tal nao rai, pơ ala kơ rŏng pơgiăng soh hăng rơnoh pơkă yua kơ rơnoh bơtơhmal kơ hơdôm bruă ngă soh anai lu biă.

 “Lom akô̆ bơyan tơbâo, khul wai lăng bruă pơgiăng lăi pơhing kơ rơgao rơnoh pơkă, mơnuih mơgăt rơdêh pơkôl ngă djơ̆ tui tơlơi lăi pơhing mơng wai lăng bruă dŭ pơgiăng”.

Trung tá Lê Công Ngọc, Khua Grŭp tơhan wai lăng bruă rô nao rai ƀơi jơlan glông mrô 1, Anom bruă tơhan polih wai lăng bruă nao rai, Kông ang tơring čar Gia Lai brơi thâo: Mơng akô̆ bơyan tơbâo truh ră anai, grŭp hmâo bơtơhmal laih rơbêh kơ 100 mơta tơlơi. Ră anai hơdôm kual pla tơbâo ƀơi Gia Lai ăt dô̆ mơn mrô tơbâo đĭ truh hơdôm rơtuh rơbâo tơn tơbâo ƀơi đang pla, anun anom ăt pơtrut kơtang mơn hơdôm bruă wai lăng rơnoh pơgiăng.

 “Amăng bơyan tơbâo thun 2022-2023, Anom bruă tơhan polih wai lăng bruă nao rai, ƀơi anăp lĕ Grŭp mrô 1, gơgrong wai lăng ƀơi Jơlan 25 hmâo brơi kĭ laih tơlơi pơkôl hăng 157 bôh rơdêh pơgiăng tơbâo nao pơ̆ sang măi pơkra sik Ayun Pa. Anom bruă tơhan wai lăng bruă nao rai hmâo gum hrom laih hăng 5 bôh tơring glông hmâo kual pla tơbâo, rim rơwang hrơi tơjuh ƀing gơmơi gum hrom ƀơi anăp hăng hơdôm bôh tơring glông pioh pơsir tui akô̆ ñu rơgao rơnoh pơgiăng”.

Kiăng đĭ tui bruă pel ĕp, lăng tui hơdôm rơdêh hmâo gru nam pơgiăng rơgao hơnong pơkă, Anom wai lăng jơlan nao rai dêh čar Việt Nam hmâo rơkâo laih hơdôm bôh Gơnong bruă wai lăng bruă dŭ pơgiăng, hơdôm Anom wai lăng jơlan črâo ba khul Pel ĕp ƀơi jơlan nao rai mă yua măi mok čih pioh rŭp, mơng anun pơphun bơtơhmal hơdôm rơdêh ngă soh tơlơi pơkă. Kơnuk kơna ăt hmâo mă yua laih Tơlơi pơtrun pơkă 123, amăng anun, đĭ lu rơnoh bơtơhmal hăng tơlơi ngă soh pơgiăng ƀu djơ̆ rơnoh pơkă. Đại tá Đỗ Thanh Bình, Kơ-iăng Khua Anom tơhan polih wai lăng jơlan nao rai dŭ pơgiăng brơi thâo, kiăng pơsir tơpă tơlơi anai khom pơsit rơđah bruă gơgrong mơng ƀirô wai lăng tơlơi pơhlôm klă rơdêh pơgiăng khom ngă tơpă bôh yôm anai:

 “Ƀing gơmơi amra iâu pơhrui đut hlah khul mơnuih hăng pơpha gưl rơđah, rim anom bruă kah hăng: Anom bruă wai lăng bruă nao rai tơring čar gơgrong dơ̆ hơpă, Anom tơhan wai lăng bruă nao rai tơring glông gơgrong dơ̆ hơpă, Khua kông ang tơring glông gơgrong dơ̆ hơpă hăng tơlơi gum hrom mơng kông ang să amăng pel ĕp phun kiăng pơsit hơdôm rơdêh, hơdôm anih anom, hơdôm jơlan ba truh pơgiăng rơgao hơnong pơkă hăng pơsir tơpă. Ding jum kông ang hmâo mă bruă laih hăng Ding jum wai lăng bruă nao rai kiăng pơsit rơđah bruă gơgrong amăng wai lăng pơhlôm hơdră măi mok rơdêh, ƀu pioh rơdêh ngă hră pơ-ar sa jơlan, tơdơi kơ anun mă yua sa jơlan hăng ƀu hmâo hlơi gơgrong ba kơ phun mơng rơgao hơnong pơkă pơgiăng anun lĕ tô kơthung rơdêh dlông prong mă gah rơngiao”.

Kiăng kơtưn bruă wai lăng rơnoh pơgiăng, pơ̆ anăp anai, Ding jum wai lăng jơlan nao rai dŭ pơgiăng hmâo mă yua laih hră pơ-ar mơ-ĭt kơ hơdôm bôh ƀirô, anom bruă amăng gơnong bruă pok pơhai kơčăo bruă đing nao pel ĕp, wai lăng lu bruă pơgiăng gơnam amăng rơwang đơ đam dêh čar./.