Nai neh pơtô hrăm hră djuai ania K’Ho Ka Duys hơmâo 6 thun laih lir hơbit hăng sang hră gưl dua Tân Thượng, să kual ataih Đinh Trang Thượng. Pơtô tơlơi hrăm ră ruai Ngữ văn kơ sang hră hơmâo 95% mrô čơđai sang hră djuai ania K’Ho, ñu thâo hluh sa tơlơi kơđai glăi lĕ: lu čơđai sang hră thâo pơđok, thâo čih tơlơi Yuan samơ̆ ƀu thâo pơđok, thâo čih boh hră djuai ania pô ôh. Mơ̆ng tơlơi pơmin bơngơ̆t tui anun, thun 2022, hơmâo khua mua sang hră tŭ ư hrŏm, nai neh Ka Duys pơphun anih pơtô boh hră tơlơi K’Ho blung a ƀơi sang hră hơmâo 40 čô čơđai sang hră hrăm anih 7. Hnang blung pơtô boh hră, giong anun, ñu ĕp ƀing kơhnăk gru grua amăng plơi pla, pok anih pơtô atông čing, suang arap laih anun djru pơtô ba tơlơi thâo amăng gru grua djuai ania pô kơ čơđai sang hră. Nai Ka Duys kah pơpha, hơdôm mông pơtô hrăm ƀu kơnong djru kơ čơđai thâo pơđok, čih tơlơi K’Ho đôč ôh, dŏ thâo hluh lu anŏ hiam amăng gru grua đưm djuai ania pô dơ̆ng.

“Jing djuai ania K’Ho kâo ƀuh ră anai tơdah ƀu djă pioh wai pơgang ba gru grua đưm djuai ania lĕ kơñ pơgi či rơngiă soh sel đôč. Mơ̆ng bruă ngă anet đôč, hăng hơdôm čơđai sang hră anai, ăt jing a apui jă tui, pioh kơ ƀing adơi đeh anăn amôn thâo hluh rơnoh yom amăng gru grua đưm, gơñu ba yua tơlơi thâo mơ̆ng gơñu kiăng djă pioh gru grua hiam djuai ania K’Ho pô ta”.

Ƀơi hơdôm sang hră kual mơnuih djuai ania ƀiă dŏ tơring čar Lâm Đồng, lu nai pơtô ăt gir run ngă hrŏm ƀing čơđai sang hră dơ̆ng mơ̆ng bruă ngă anet aneo rơđah rơđong. Nai neh Nguyễn Thị Hương Giang, Khua grup pơtô sa tơlơi hrăm, sang hră gưl dua Phan Đình Phùng, să Dam Rông lăi lĕ, tơlơi khăp kơ čơđai sang hră hơmâo pơdah brơi amăng rim sa tơlơi hrăm, pơtô pơblang amăng anih hrăm. Thun hrăm laih rơgao, ƀing čơđai sang hră, anih nai Giang wai lăng hơmâo mă 9 pri apah bơni čơđai sang hră hrăm rơgơi gưl tơring čar, hrŏm 4 čô čơđai sang hră hơmâo mă pri STEM gưl sang hră.

“Ta hơmâo čơđai sang hră kah ta mơ̆ng pok brơi jơlan kơ ƀing gơñu nao. Hăng ƀing čơđai sang hră kual tơnap tap lĕ ƀu kơnong pơtô tui amăng hơdrôm hră đôč ôh, pơčrâo ba gơñu hyu sem lăng sit nik tơlơi găn rơgao ƀơi hang ia krông Krông Knô kiăng gơñu thâo hluh lŏn mơnai glai klô, ia čroh hnoh, čư̆ siăng hiư̆m pă. Kâo pơmin mah tơnap tap dơ̆ pă hai, pô ngă nai pơtô hăng ƀing čơđai ta pơtô lêng kơ pơkơtưn nao rai soh kiăng pơtô thâo, hrăm rơgơi”.

Hăng ƀing nai pơtô ƀơi sang hră kual tơnap tap, khăp kơ čơđai sang hră ƀu kơnong đing nao kơ puang gơñu pơplông đôč ôh. Anun lĕ hơduah ĕp jơlan hơdră pơtrut pơsur pran jua kiăng hor hrăm hră, huăi tơbiă sang hră, djru kơ ƀing čơđai sang hră, sang anŏ tơnap tap, ƀun rin ăt gir nao hrăm hră, ngă mơak pran jua ƀing čơđai sang hră mơnuih djuai ƀiă h’ĭn pran jua gơñu pô.Tơlơi kiăng anun, mơ̆ng nai pơtô Nguyễn Quốc Huy, Khua khul mơnuih ping gah amăng sang hră, Khua sang hră gưl dua Nguyễn Trường Tộ, să Tân Hải, ñu ngă bruă abih 22 thun hăng anai laih. Nai tom wai lăng, pơsir tơlơi hơmâo kơ ƀing nai pơtô, ƀing ngă bruă amăng sang hră, truh pơ đing hmư̆ tơlơi kiăng mơ̆ng rim čô čơđai sang hră, ñu djru ba, juh alum, pơsir hăng tơlơi rơnang tơpă, mơak pran jua, hmư̆ bơkơnar soh.

“Wa Hô pơtô lăi kơ ƀing ta tơlơi khăp tơdruă ană mơnuih. Sang hră mơak hlak lĕ anih tơlơi pơmin ba tơlơi hiam mơak dưi ngă tui sit nik. Ƀing khua mua git gai wai lăng đing hmư̆ tơlơi kiăng mơ̆ng ƀing nai pơtô. Nai pơtô lĕ thâo hluh tơlơi kiăng mơ̆ng ƀing čơđai sang hră. Hrăm tui Wa lĕ ngă tui bruă akŏ pơjing sa boh sang hră jing anih pioh kơ djop mơnuih hơmâo tơlơi pơhiăp dưi pơpŭ pơyom, đing hmư̆ jing phun akha tơlơi hiam amăng gru grua sang hră hrăm mơak klă hơđong kơjăp”.

Mơ̆ng bruă pơtô hrăm hră, pơtô ba tơlơi thâo djă pioh boh pơhiăp, gru grua hiam djuai ania pô hăng akŏ pơjing anih anom sang hră mơak klă, ƀing nai pơtô, ƀing neh ngă nai pơtô hrăm hră ƀơi kual ataih, kual asuek tơring čar Lâm Đồng hlăk kret kruai kah hăng ƀu hmư̆ dơnai ôh ngă bruă rah pơjeh “ia rơgơi” hăng tơlơi đăo kơnang kơ čơđai sang hră khăp ƀu-eng. Rim mông nao pơ sang hră, pơtô hrăm, găn rơgao lĕ sa tơlơi hiam mơak pioh kơ ƀing čơđai sang hră ană ƀun rin hơđong pran jua hrăm hră, găn rơgao ngă tui tơlơi thâo thăi, khăp kơ sang hră, khăp kơ gru grua djuai ania hăng yak nao kơjăp kơñ pơgi adih.