Yak nao amăng thun phrâo, tơring čar Dak Lak him lăng pơhrŏ 51% mrô anăn sang hră tơdơi kơ pơmut glăi djop sang hră jing sa amăng sa boh să. Hơdră anai dưi hơmâo khua mua apăn bruă phun ping gah tơring čar Dak Lak pơgôp hiăp lơ̆m jơnum lok 27. Tui hăng anun, mrô sang hră gưl muai trun mơ̆ng 356 trun dŏ 150 boh sang anŏ; sang hră gưl sa mơ̆ng 450 boh sang hră trun dŏ 134 boh sang hră; sang hră gưl dua mơ̆ng 284 boh trun dŏ 92 boh sang hră. Lơ̆m anun, hơbô̆ sang hră dua gưl dưi akŏ pơjing glăi đĭ tui, gưl sa hăng gưl dua mơ̆ngg 63 boh sang hră đĭ159 boh sang hră. Sang hră gưl klâo, him lăng pohrŏ 10 boh sang hră, trun dŏ 68 boh sang hră.  Gah sang hră pơtô hrăm bruă mă-pơtô hrăm re se dưi dăp glăi trun mơ̆ng 24 trun đŏ 5 boh sang hră pơtô hrăm bruă mă –pơtô hrăm re se hăng 4 boh sang hră pơhrăm bruă mă gưl ƀrô. Tui hăng khua ping gah tơring čar Dak Lak, ơi Lương Nguyễn Minh Triết, bruă dăp glăi, pơmut sang hră huăi bơbeč truh kơ tơlơi hrăm hră pơar ƀing čơđai sang hră ôh.

“Hlâo adih khua sang hră git gai sa bruă đôč, ră anai hơmâo 5 boh sang hră khom wai lăng abih 5 bit sang hră, 5 čơƀeng sang hră, ngă hiư̆m pă pơpha mông pơtô pơhrŏ hĭ mrô nai ƀơi sang hră hơmâo anih rơbêh, hơmâo anih kơƀah kiăng djơ̆ rơ-ua. Ƀing nai pơtô amra dưi pơpha hyu pơ djop sang hră či pơtô, yua kơ anăn sa boh sang hră, amăng sa boh să khom dăp glăi pơpha bruă djơ̆ găl, tơlơi anai tui hluai tơlơi thâo amăng bruă mă git gai wai lăng mơ̆ng pô khua sang hră, pơpha bruă mă hăng pơpha git gai wai lăng mơ̆ng pô khua sang hră anun yơh phun”.

Mut thun hrăm phrâo, tơring čar Lâm Đồng pơhrŏ trun dŏ glăi 825 boh sang hră kơnuk kơna pơdong. Bruă dăp glăi sang hră hơmâo ngă lăp djơ̆ hăng mrô ană mơnuih, anih dŏ hăng anŏ kiăng wai lăng phrâo. Bruă dăp glăi sang hră gưl muai, sang hră gưl sa truh gưl klâo, sang hră pơtô hrăm re se mơ̆ng tơring čar Lâm Đồng hơmâo abih bang khua mua wai lăng tŭ ư soh. Nai Phạm Thị Ngọc Bích, Khua sang hră anih muai Dạ Tông, să tơnap tơnap Dam Rông 4, brơi thâo, Ƀing khua sang hră hăng nai pơtô pơ anai tŭ ư laih bruă pơƀut hrŏm sang hră gưl muai Dạ Tông hăng sang hră gưl muai Dạ Long:

 “Bruă pơmut hrŏm sang hră tui hăng kâo pơmin lĕ dăp glăi mơ̆ng Khua sang hră truh jing Kơ-iăng khua ƀudah trun ngă nai pơtô, jing gơmơi ăt hơđong pran ngă bruă mơn, huăi hơget lơi. Mơ̆ng hrơi phrâo hrăm giong, kâo rai mă bruă pơ anai laih, anun jing sang hră anai juăt laih hăng kâo, hơmâo anŏ mơak, anŏ khăp kơ ƀing čơđai pơ anai. Anun jing ngă bruă anai bruă adih tŭ mơn huăi hơget ôh. Leng kơ bruă wai lăng pơtô ba ƀing čơđai anih muai soh”.

Thun hrăm phrâo 2026-2027 hlăk giăm laih. Lơ̆m pơmin nao kơ lu rơnoh prăk tuh pơ alin či blơi gơnam yua hlâo kơ mut thun hrăm phrâo, kah hăng hơdrôm hră hrăm mah rơnoh prăk ƀu lu đơi ôh samơ̆ hăng lu sang anŏ ngă bruă ĕp prăk rim hrơi kơƀah kơƀap, sang anŏ lu ană bă, anai lĕ 1 črăn prăk tuh pơ alin ăt prong mơ̆n. Yua kơ, tơlơi rơkâo mơ̆ng jơnum min mơnuih ƀôn sang tơring čar Gia Lai kơ jơlan hơdră ngă tui blơi brơi soh đôč hodrôm hrăm ƀơk kơ čơđai sang hră tơnap tap amăng tơring čar, sa bruă mă yom biă mă, hăng rơnoh prăk truh 42 klai.

Hrŏm hăng anun, huăi bơngơ̆t nao hơdrôm hră hrăm brơi kơ čơđai sang hră, sa tơlơi mơak prong dơ̆ng ƀơi plơi Kon Sơlăl, să Ia Khươl, tơring čar Gia Lai hơmâo sang hră hrăm phrâo hiam klă, rơgoh hơdjă dưi man pơdong giăm plơi. Ƀing čơđai sang hră huăi tơgŭ tañ đơi mơ̆ng mơguah adai aka rơđah či rơbat tơkai nao pơ sang hră, huăi hŭi ia ling dăo amăng bơyan hlim. Jơlan nao pơ sang hră truh ră anai kơnong hơdôm hơpluh mơnit truh yơh pơ sang hră. Ayong Wat, 38 thun, plơi Kon Sơlăl, să Ia Khươl lăi:

“Hlăk dŏ ƀơi plơi hơđăp, ƀing gơmơi khom tơgŭ mơ̆ng 5 mông rơbat tơkai kiăng nao truh pơ sang hră hmao mông hrăm hră. Ră anai sang hră giăm plơi laih, nao rai amuñ biă mă. Mah dŏ lu tơlơi tơnap tap, samơ̆ ră anai sang hră giăm gir run pơtrut ană bă hrăm hră, kiăng thâo hră. Thun hrăm phrâo anai blơi sum ao, kơdung hră phrâo, gơnam yua djop pioh nâo sang hră, plai ƀiă tơnap tap. Bơni kơ ping gah, kơnuk kơna hơmâo đing nao djru ba ană plơi pla gơmơi”.

Anom bruă pơtô hrăm tơring čar Lâm Đồng hơmâo prăp rơmet giong laih kiăng dua boh sang hră kơnuk kơna čem rông gưl sa hăng gưl dua să Quảng Trực hăng să Thuận An mă bruă amăng hrơi mut thun hrăm phrâo blung a 2026-2027. Dua boh sang hră anai hơmâo jao ruah 60 anih hrăm, hăng 1.770 čô čơđai, mơ̆ng anih 1 truh anih 9. Amăng anun, Sang hră kơnuk kơna čem rông pơƀut dua gưl Thuận An ruah 30 anih hrăm hăng 870 čô čơđai; Sang hră kơnuk kơna čem rông pơƀut dua gưl Quảng Trực hơmâo ruah 30 anih hrăm hăng 900 čô čơđai. Dua boh sang hră mă bruă amăng thun hrăm 2026-2027, ngă gêl găl brơi čơđai sang hră pơ guai dêh čar, biă ñu lĕ čơđai djuai ania ƀiă, dưi hrăm hră hăng mă bruă amăng anih hrăm hơđong, gêh găl hloh. Mơ̆ng anun, hơdôm ring bruă ƀu kơnong ngă klă tui bruă pơtô hrăm đôč ôh, ăt ƀơ ƀrư̆ pơkra giong anih anom pơtô hrăm kiăng hloh, jing phun atur đĭ kyar hơđong ƀơi plơi pla gah guai tơring čar.

Jơnum min mơnuih ƀôn sang tơring čar Dak Lak ngă hră dăp hlâo pơphun ngă yang jơnum mut thun hrăm phrâo 2026-2027 hăng jơnum mă yua djop sang hră đôm lăm dua gưl giăm guai dêh čar ƀơi tơring čar. Tui hăng akŏ bruă, jơnum ngă yang mut thun hrăm phrâo 2026-2027 amra pơphun sa hrơi amăng kơnôl 5/9/2026. Amăng anun, jơnum ngă yang ba yua sang hră đôm lăm dua gưl ƀơi djop să kah hăng Ƀuôn Đôn, Ia Lôp, Ia Rvê hăng Ea Rôk. Anih phun pơƀuh ƀô̆ mơta jơnum mơ̆ng ataih lăng nao rai amăng tivi hăng tơring čar, pơphun ƀơi sang hră đôm lăm dua gưl, gưl sa hăng gưl dua Ƀuôn Đôn, pơtruh nao rai tơlơi pơhing hăng hơdôm sang hră đôm lăm Mường Khương, să Mường Khương, tơring čar Lao Cai. Bruă pơphun ngă yang jơnum ba yua sang hră đôm lăm dua gưl anun amăng sa mông, kiăng ngă mơak hrŏm, pơtrut pran jua, ba tơlơi hơ̆k mơak lu hloh kơ ƀing nai pơtô, khua mua apăn bruă git gai wai lăng sang hră hăng čơđai sang hră mut thun hrăm phrâo mơak mơai.

Jơnum min mơnuih ƀôn sang tơring čar Quảng Ngãi pơtrun Akŏ bruă ngă lơphet mut thun hrăm phrâo 2026-2027, pơlir hăng Ngă yang mă yua hơdôm boh sang hră kơnuk kơna čem rông pơƀut dua gưl ƀơi hơdôm boh să gah guai hăng kơdư. Tui hăng bruă kiăng ngă, mơguah kơnôl 5/9, tơring čar ngă yang mă yua 4 boh sang hră kơnuk kơna čem rông ƀơi hơdôm boh să Dục Nông, Sa Loong, Rờ Kơi hăng Mô Rai. Anih ngă yang phun mơtăm ƀơi Sang hră kơnuk kơna čem rông gưl sa - gưl dua să Dục Nông, pơtruh hăng djŏp tơring amăng dêh čar, hơdôm anih dŏ glăi hơmâo pơphun jơnum lăng tui mơ̆ng ataih mơn. Bruă ngă lơphet mut thun hrăm phrâo hăng mă yua sang hră pơ guai dêh čar kiăng hơmâo pran jua mơak lơ̆m mut thun hrăm phrâo, pơsit tơlơi lăng ba mơ̆ng Ping gah, Kơnuk kơna hăng bruă pơtô hrăm pơ kual mơnuih ƀon sang djuai ƀiă, čư̆ siăng hăng pơ guai dêh čar. Djru ngă gêh găl brơi čơđai hrăm hră, pơhlom čơđai sang hră pơ kual tơnap tap dưi hrăm hră klă hloh.