Ƀơi plơi prong Ƀuôn Ma Thuôt, Hơdră “Hrơi abih bang mơnuih ƀôn sang ngă hrom pơyơr drah” thun 2023 pơhưč rơbêh 600 čô mơnuih jing ƀing khua mua, mơnuih apăn bruă, ling tơhan blah ngă hăng tơdra mut phung nao pơyơr drah. Mơ̆ng anun hơmâo pơhrui glăi 450 anung drah. Hơdôm hơpluh wơ̆t ngă hrom pơyơr drah, ayong Nguyễn Văn Kiên, dŏ pơ phường Tân Thành, plơi prong Ƀuôn Ma Thuột lăi:

“Kâo ngă hrom pơyơr drah 25 wơ̆t, hrơi anai ăt nao pơyơr dơ̆ng mơ̆n. Rĭm wơ̆t nao jur drah ta kơ arăng ƀuh huăi hơgĕt lơi, sit hơmâo nao pơyơr drah pran jua mơak biă mă yua dưi kah pơpha ƀiă drah ta kơ mơnuih hlăk kiăng djru drah amăng mông pơ-ai buai kraih”.

Bơ yă Ayun H’Hương, Khua Khul ia jrao kyâo bơrơkal mriah tơring čar Dak Lak brơi thâo, hơdôm thun giăm anai, mrô anom bruă, sang bruă kơnuk kơna, sang măi, kông ty, sang hră ngă hrom bruă mă pơyơr drah jai hrơi lu tui, kơñg kơ tơlơi jơnum jak iâu anăn Hrơi mơak bơyan bơnga hêm, hrơi tơjuh mriah, jơlan bruă mă mriah....Hơdôm hrơi jơnum lu mơnuih pơyơr drah hơmâo pơjing anŏ gêh găl kơ lu mơnuih djru kah pơpha drah ta pô kiăng pơhơdip glăi mơnuih duam kraih kiăng mă drah pơjrao duam ruă.

Hơdră hơdor glăi 23 thun hrơi abih bang mơnuih ƀôn sang ană plơi pla ngă hrom pơyơr drah jing mông kiăng pơđĭ tui tơlơi thâo hluh, bruă mă, anŏ kiăng hiam, yôm phăn mơ̆ng bruă mơnuih ƀôn sang pơyơr drah, ngă bang hyu prong amăng bruă mă pơsur ană plơi pla ngă tui.

“Ăt čang rơmang amăng hrơi anai hăng hơdôm hrơi tơdơi adih dơ̆ng mơnuih ƀôn sang amăng tơring čar ngă tui bruă pơyơr drah klă hloh. Thun blan pơ anăp, ƀing gơmơi ăt pơtô lăi kơ bruă pơyơr drah amăng tơring čar pioh bruă ngă pơyơr drah jai hrơi pơđĭ kyar tui hloh”.

Ăt amăng akŏ blan pă phrâo anai mơ̆n, Khul git gai pơyơr drah tơring čar Kon Tum pơphun hrơi jak iâu abih bang mơnuih ƀôn sang pơyơr drah lơ 7/4 hăng akŏ ñu “Pơyơr tơdjôh drah hiam-jao glăi tơlơi hơdip”. Tui hăng tơlơi lăi pơthâo amăng mông pơphun bruă: amăng hơdôm thun rơgao, bruă wai lăng, pơgang ba tơlơi suaih mơnuih ƀôn sang hăng bruă jak iâu pơyơr drah ƀơi tơring čar Kon Tum hơmâo djru hrom prong biă mă djru mơnuih duam ruă. Kơnong thun 2022 phrâo rơgao, tơring čar pơphun  34 wơ̆t pơyơr drah, tŭ mă hơmâo 6.800 anung drah, dưi ngă 136% tơhnal bruă jao mơ̆ng Khul git gai dêh čar brơi jak iâu pơyơr drah.

Bruă pơsur djop mơnuih pơyơr drah lar hyu djop anih anom amăng tơring glông, plơi prong hăng djop sang bruă amăng tơring čar Kon Tum jing hĭ bruă mă gru grua hiam klă. Yă Nguyễn Thị Hoài Ven, Khua Khul ia jrao kyâo bơrơkal mriah, Kơ-iăng Khua git gai phung pơyơr drah tơring čar Kon Tum, brơi thâo:

“Thun 2023, Khul ia jrao kyâo bơrơkal mriah tơring čar Kon Tum jing anom bruă phun git gai amra pơphun lu bruă mă hăng hơdră pơprong, kah hăng : Hơdră jơnum bơyan bơnga hêm, hrơi abih bang mơnuih ƀôn sang pơyơr drah, jơlan ngă bruă mriah....Tơhnal pơkă kiăng ngă amăng thun 2023 amra pơhưč boh ƀiă ñu kiăng hơmâo 7.200 anung drah. Mơnuih ƀôn sang ră anai thâo hluh laih mơ̆n kơ bruă pơyơr drah tơlơi pap”.

Khul git gai jak iâu pơyơr drah tơring čar Kon Tum pơkă tơhnal bruă thun 2023 kiăng jak iâu hơmâo 1.500 čô mơnuih čih anăn pơyơr drah hăng tŭ mă 7.200 anung drah, dưi djop brơi sang ia jrao prong ba yua pơjrao kơ mơnuih kiăng jur drah ječ ameč. Tơdơi kơ jơnum jak iâu mơtam, lơ 7/4, Khul ia jrao kyâo bơrơkal mriah tơring čar Kon Tum hơmâo tŭ mă drah mơnuih ƀôn sang nao pơyơr hăng amăng blan pă jak iâu pơyơr drah, tŭ mă abih bang 720 anung drah.

Mơ̆ng akŏ thun, ƀơi plơi prong Ƀuôn Ma Thuôt, tơring čar Dak Lak ăt hơmâo pơphun bruă ngă anăn Hơdră “Hrơi tơjuh mriah” tal 15 ƀơi kual Dap Kơdư. Tal pơphun bruă anai, hơmâo rơbêh 600 čô tơdăm dra čơđai sang hră, nai pơtô sang hră gưl prong, ƀing ơi ia jrao dŏ mă bruă pơ sang Hră gưl prong Đại học Y dược Ƀuôn Ma Thuột, tơring čar Dak Lak nao pơyơr drah. Pơđut hơdră, hơmâo tŭ mă rơbêh 500 kơdung drah pioh lui, mơ-it nao amăng anih pơ anăn sang bruă djă pioh drah dêh čar. Tom nao pơyơr drah truh 20 wơ̆t, ayong Quốc Đình Khánh, khua khul pơčrang kman duam ruă, gah anom bruă pơčrang kman, sang ia jrao Đại học Y dược Ƀuôn Ma Thuôt lăi:

“Anai lĕ bruă mă yôm biă, kiăng ječ mơ̆n, sa tơlơi khăp pap hiam klă djru ba kơ mơnuih duam ruă. Kâo ăt jing mơnuih mă bruă gah sang ia jrao mơ̆n anun kâo thâo hluh tong ten bruă pơyơr drah anŏ kiăng ječ hiư̆m pă laih anun huăi ngă răm hơgĕt lơi kơ drơi jăn pô pơyơr drah anun kâo pơtrut pơsur abih bang gơyut gơyâo hlăk ai tơdăm dra tơdah djop anŏ gêh găl khom gum hrom pơyơr drah yơh”.

Hơdră “Hrơi tơjuh mriah” tal 15 dưi pơphun ƀơi 3 bit anih phara amăng kual Dap Kơdư, hơmâo sang hră gưl prong Đại học Tây Nguyên, tơring glông Čư̆ Mgar hăng tơring glông Ea Kar tơring čar Dak Lak. Hăng boh pia kiăng thâo “Pơyơr drah pơhơdip mơnuih, bưng bôt mơ̆ng gơyut hăng kâo”, hơdră anai kiăng lar hyu prong rơnoh yôm hiam klă, pơgôp nao amăng bruă djă pioh drah dêh čar pioh pơpha hyu djru pơklaih mơnuih ruă, pơhơdip glăi mơnuih duăm kraih.