Tơdơi kơ lu blan adai pơ-iă không phang kơtang tit, dơnao ia Dan Kia-Suối vàng, hnoh ia prong hloh ƀơi tơkai čơ̆ Lang Biang, ră anai thu krô rơđah atur mơtam. Lŏn hlŭ, dơlut amăng atur ia ăt tơl thu čơđang pơrơhư̆. Ngă hmua amăng kual lŏn hơmâo ia bruih mă mơ̆ng ia dơnao, hnoh anai, pơđoh ba kơ mơnuih ngă hmua pơ tơring kual Lạc Dương, tơring glông Lạc Dương, tơring čar Lâm Đồng, khom tô tui lu črăn đing, kiăng dưi pơtrun đing truh pơ hnoh ia dŏ glăi amăng alŏk, amăng rơ-ưng atur dơnao adih đôč. Ơi Čil Mên, dŏ ƀơi tơring kual Lạc Dương brơi thâo, bơyan không adai phang amăng thun anai sui blan biă mă pơkă hăng tơđar thun, hlăk bơbeč sat truh kơtang kơ phun pla amăng đang hmua sang anŏ:

“Kah hăng tơđar thun lĕ, bơyan anai hơmâo ia hơjan laih, thun anai aka ƀu hơmâo hơjan sa wơ̆t pơpă ôh. Mơnuih ƀôn sang bơngơ̆t biă mă samơ̆ ƀu thâo ngă hơgĕt ôh, biă mă ñu ƀing ngă hmua, đang tơđah ƀu hơmâo hơjan lĕ, ƀu hơmâo ia bruih sit mơ̆n pơdai amăng hmua dơnao, hmua na djai krô abih yơh djơh hăng anai noh”.

Ăt yua kơ adai không phang bơyan phang pơ-iă kơtang đơi, abih bang hmua đang phun pla pơkŏn ƀơi hmua dơnao plơi Đoàn Kết, să Ayun Hạ, tơring glông Phú Thiện, tơring čar Gia Lai, djai krô hĭ abih mơ̆n. 80 hektar hmua pơdai pơ anai krô hla, ƀu dưi rŭ glăi dong tah năng ai ñu. Ơi Vũ Văn Khiển, mơnuih ƀôn sang plơi Đoàn Kết, brơi thâo, bơyan hmua puih phang thun anai, sang gơñu anŏ rah pla 12 hektar, prăk tuh pơ alin abih tih 400 klăk, samơ̆ adai pơ-iă kơtang djơh hăng anai či rơngiă soh sel đôč:

“Yua kơ thun anai ia hơjan abih tañ, abih hnuăl biă mă. Pơ anai ngă hmua kơnang kơ hnoh ia Ake đôč. Tui hăng rơnoh jŭ yap mơ̆ng bơyan ngă hmua, ƀing gơmơi ƀiă či rơgao yan, pơkă hăng tơđar thun kah hăng bơyan anai lĕ ăt dŏ hơmâo ia bruih, samơ̆ thun anai ia amăng čroh hnoh, ia ania thu abih, hrŏ kơtang anun yơh hmua pơdai djai krô soh sel kah hăng anai”.

Ƀơi tơring glông Krông Knô, anih lăi ngă hmua bưp tơlơi pơ-iă kơtang kơƀah ia lu biă mă ƀơi tơring čar Dak Nông, thun anai tơlơi pơhing adai pơ-iă kơtang phang khôt hloh kơ lu thun tơđar. Jơlah ia ƀơi abih bang 33 ring bruă bơnư̆ pơkong, pơđoh ba ia bruih lêng kơ hrŏ kơtang, hơmâo anih đa thu hlao. Ơi Doãn Gia Lộc, Khua anom bruă Ngă hmua hăng pơđĭ kyar plơi pla tơring glông Krông Knô brơi thâo, tơring glông hlăk prăp lui bruă mă hơdai gum hrŏm hăng lu sang bruă wai lăng dơnao ia, bơnư̆ pơkong amăng kual treng ia krông pơprong pioh pơpha mông pok pơhai ia brơi kơ anih ngă hmua pla pơdai lu. Amăng anun, hơmâo dơnao sang măi apui lơtrik khom brơi pok pơhai ia kơ kual gah tơkai adih mah amăng mông ƀu pơkă apui lơtrik hai:

“Mông pơkĕ apui lơtrik hăng pil pơ-iă yang hrơi laih kiăng pơdar djop grup măi pơkĕ apui lơtrik amăng sang măi. Ƀign gơmơi khom ngă hrŏm hăng sang măi drai apui lơtrik Ƀuôn Kuôp, mơ̆ng 10 mông mơguah či truh hrơi dong hlong truh kơ 3 mông či tlam kông pơdơi, samơ̆ mơ̆ng 3 mông tlam truh 9 mông mơguah hrơi tơdơi lĕ kông ty khom ngă tui bruă pok pơhai pơpha ia bơwih brơi kơ bruă ngă hmua, mah pơkĕ apui lơtrik pơmut hrŏm hă ƀô̆”.

Tui hăng ơi Trần Văn Khánh, Khua kông ty sang măi drai apui lơtrik Ƀuôn Kuôp, jing sang bruă wai lăng 3 boh sang măi apui lơtrik čoh rơñan ƀơi hnoh ia krông Krông Knô, rô găn nao amăng dua boh tơring čar Dak Nông hăng Dak Lak, brơi thâo, thun anai tơlơi truh ayuh hyiăng Elnino ngă ƀuh rơđah ba mơtam. Hnong ia hơjan hăng ia amăng hnoh krông rô glăi pơ dơnao pơkong ia aset biă pơkă hăng hơdôm thun hlâo. Kông ty hơmâo ngă bruă hăng djop tơring glông dua boh tơring čar Dak Lak hăng Dak Nông kiăng thâo tong ten tơlơi pơhing kơ bruă či yua ia ƀơi plơi pla. Mơ̆ng anun, dăp hơdră brơi kah pơpha ia yua tui hăng tơlơi pơkă brơi pơpha mơ̆ng djop dơnao pơkong ia hơmâo khua dêh čar pơsit brơi laih.

“Ngă tui tơlơi pơčrâo trun mơ̆ng Khua dêh čar hăng hơdôm pok hră pơtrun mơ̆ng tơring čar Dak Lak, Dak Nông kơ bruă bong glăi tơlơi truh adai không phang pơ-iă kơtang, kơƀah ia yua, ƀing gơmơi ngă hrŏm pơpha bruă kiăng pơhlôm brơi djop ia yua”.

Bơyan không phang kơƀah ia, mơ̆ng sui laih ƀuh kah hăng sa tơlơi lông lăng prong amăng tơlơi hơdip mơda mơnuih ƀôn sang, bruă ngă hmua pla pơjing kơ lu anih ƀơi Dap Kơdư. Samơ̆ anŏ pơblih ayuh hyiăng lŏn tơnah, tơbiă rai mơ̆ng bruă rơngiă kyâo glai, lŏn glai hnong hnăi abih, jai kraih pơhŭi truh tơlơi pơhlôm ia yua. Djop tơring čar hlăk ngă hrŏm lu hơdră, ĕp lu črăn bruă, mơnuih gum hrŏm pơsir bruă pơgang adai pơ-iă phang khôt kơƀah ia, đah mơ̆ng pok pơhai amăng bruă mă tŭ yua hloh, pơgăn đut tơhnal anŏ răm ƀăm amăng bruă ngă hmua pla pơjing.

Tui hăng Anom bruă pơkă lăng ayuh hyiăng adai hơjan bơyan hlim kual Dap Kơdư, amăng hơdôm blan akŏ thun 2024, hơjan hơmâo laih mơ̆n ƀiă ƀơi Gia Lai samơ̆ aset hloh kơ tơđar thun. Yap mơ̆ng rơnuč thun 2023 truh ră anai, jơlah ia krông, ia ania, ia čroh hnoh hrŏ thun tui laih soh laih anun hơmâo lu anih ia kơƀah kơtang ƀu djop ia yua ba bruih, biă mă ñu anih ataih mơ̆ng ring bruă bơnư̆ pơkong ia.

Tui hăng anun, hnoh ia krông Apa hăng ia Ayun ăt hrŏ tui, yap hnong ia rô rơnang hloh mơ̆ng 31-49% pơkă hăng rim thun. Lăi lui hlâo mơ̆ng ră anai truh blan 5/2024 adai pơ-iă phang khôt ăt dŏ kơtang hăng ƀơi lu anih. Amăng hrơi blan anai, djop ia krông, ia čroh hnoh ƀơi Gia Lai sit năng ai amra kơƀah ia yua ia thu abih mơ̆ng hlao ia. Ba truh tơlơi kơƀah ia yua ƀơi hơdôm anih ƀu djop ia bruih kơ hmua, tơlơi anai ăt ƀuh lui laih mơ̆ng rơnuč blan 3 anai, sit amra sui hloh adai không kơtang phang khôt ƀơi Gia Lai.