Đĭ pơhiăp amăng mông jao hră pơsit, Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, bruă Khua pơ ala mơnuih ƀôn sang dêh čar tal 15 hơmâo tơlơi pơtrun mrô 38 kơ bruă ngă lông lăng sa, dua hơdră bruă yôm phara pơđĭ kyar tơring čar Thừa Thiên Huế, amăng anun pơkă tong ten sa, dua hơdră bruă yôm phara kơ bruă wai lăng prăk kak, ngăn drăp kơnuk kơna, prăk duh hyu čuă lăng hăng keh prăk djă pioh gơnam yôm Huế, ngă atur kiăng pơtrut bruă pơđĭ kyar hơđong, bơkơnar, djơ̆ hrŏm, kiăng djă pioh, tŏ tui rơnoh yôm mơng gơnam sô hơđăp rah, hăng pơtrut pơđĭ kyar bơwih ƀong huă-mơnuih mơnam, pơhlôm rơnuk rơnua, hơđong, pơjing anih anom mă bruă hơđong.

Khua git gai pơ ala mơnuih ƀôn sang dêh čar ơi Trần Thanh Mẫn rơkâo, gưl Ping gah, gong gai ƀôn prong Huế hơmâo akŏ bruă tong ten, rơđah rơđông, kiăng pơsir hĭ tơnap tap, tơlơi lông lơm ƀôn prong đĭ gah gơnong glông.