Lơ 19/5, Khua čih pioh sang bruă khua pơ ala mơnuih ƀôn sang dêh čar jơnum lăi pơthâo hơdră jơnum lok 5, khua mua pơ ala mơnuih ƀôn sang dêh čar ral XV. Jơnum lok 5, tal XV amra jơnum prăp lui hlâo hăng pok jơnum sit nik amăng lơ 22/5, him lăng pơđut jơnum truh lơ 23/6 tui hăng hơdră jơnum pơtum abih bang ƀơi sang bruă khua pơ ala mơnuih ƀôn sang dêh čar. Jơnum lok 5 dưi pơphun 2 črăn. Tal 1 mơ̆ng lơ 22/5 truh lơ 10/6. Tal 2 mơ̆ng lơ 19-23/6, (mơ̆ng lơ 11-18/6, ƀing pơ ala pơdơi pioh kơ djop anom bruă gah sang bruă khua pơ ala mơnuih ƀôn sang dêh čar čih pioh, ming pơkra glăi, ngă pơgiong hơdôm tơlơi phiăn, hră pơtrun).

Hrơi blan jơnum lok anai abih bang 22 hrơi. Ƀơi mông jơnum anai, ƀing pơ ala mơnuih ƀôn sang amra sem lăng, pơsit 8 tơlơi phiăn, 3 hră pơtrun. Hrom hăng anun, ƀing pơ ala mơnuih ƀôn sang sem lăng, pơgôp hiăp pơtong glăi pơhrua nao dơ̆ng boh tơhnal ngă tui akŏ bruă pơđĭ kyar bơwih ƀong huă mơnuih mơnam hăng yua prăk kơnuk kơna thun 2022; tơlơi pơhing ngă tui akŏ bruă bơwih ƀong huă mơnuih monam hăng yua prăk kăk kơnuk kơna amăng hơdôm blan akŏ thun 2023.