Rim mơguah hrơi pă, sang bruă ngă hră pơar bơwih brơi mơ̆ng kơnuk kơna să Hàm Tân, jing anih bưp nao rai plah wah khua mua gong gai kơnuk kơna hăng mơnuih ƀôn sang. Hrŏm hăng bruă tŭ mă hră pơar mơnuih ƀôn sang ba nao pơsir, hơmâo kơčok ia hling brơi laih, wơ̆t ia kơphê dưm lui ƀơi anun jak iâu mơnuih ƀôn sang mơñum hrŏm jăng jai dŏ tơguan ngă hră ƀudah tơña hăng lăi glăi mơ̆ng ƀing khua mua să. Giong pok pơhai hơdră bruă gong gai dua gưl, să djă pioh na nao bruă ngă  rim hrơi pă “Đing hmư̆ hăng pơhiăp tom ană plơi pla”, kiăng pơjing mông mă bruă bưp nao rai, hmư̆ mơnuih ƀôn sang tơña laih anun lăi glăi djơ̆ lăp hơdôm tơlơi dŏ gun, kơđông mơ̆ dưi hmư̆ mông anun, pơsir brơi rơđah rơđong ƀơi mông anun mơtam. Ơi Trần Quang Thanh, mơnuih ƀôn sang să Hàm Tân, tơring čar Lâm Đồng lăi:

“Hơdôm hră pơar ci ngă pơdjơ̆ nao kơ lŏn sang đang hmua tơnap tap biă mă, samơ̆ yua hơmâo Hơdră rim hrơi pă tŭ jum ană plơi, hơmâo khua mua pơ anun pơtô pơtô pơčrâo brơi djop yak ngă tui pioh ngă pơgiong rhă pơar, hmar biă”.

Hrơi pă bưp mơnuih ƀôn sang ƀơi să Hàm Tân, tơring čar Lâm Đồng, ră anai jing hĭ anih mơnuih ƀôn sang lăi pơhmư̆ lu tơlơi pơhing, hră pơar lŏn mơnai, jơlan glông nao rai, tơlơi hơdip mơda mơnuih ƀôn sang dŏ gun lơ̆m nao ngă hră pơar. Tơlơi hơmâo čih pioh lĕ ƀu hơmâo pô ngă tơnap pơhiăp kơtang akhan khôn mơnuih ƀôn sang ôh, tơlơi pơhiăp djong rơnang, pơblang tong ten hmư̆ mut tơma pran jua biă mă.

Truh ră anai, Jơnum min mơnuih ƀôn sang să Hàm Tân hơmâo pơphun na nao 16 wơ̆t laih bưp bơră ruai hăng mơnuih ƀôn sang, čih pioh 523 mơta tơlơi pơgôp hiăp, rơkâo đĭ, pơkă dưm dưm sa wơ̆t bưp lĕ hơmâo čih pioh 20 mơta tơlơi pơgôp hiăp. Mơ̆ng tơlơi pơhing lăi pơhmư̆ kơ bruă ngă hră pơar, jơlan glông nao rai, lŏn mơnai, tơlơi hơdip mơda ană plơi, khua mua amăng să  đing hmư̆ hăng kah pơpha, pơblang glăi tong ten laih anun jao kơ anom bruă hơmâo tơlơi dưi sem lăng hăng pơsir. Tui hăng ơi Nguyễn Thành Nam, Kơ-iăng khua git gai ping gah, khua jơnum min mơnuih ƀôn sang să Hàm Tân lăi, anai ƀu kơnong hơdôm mông bưp rim rơwang pơkă đôč ôh, dŏ jing tơlơi ƀuăn “Pơhiăp khom nao hrŏm bruă ngă” djru mơnuih ƀôn sang ƀuh rơđah tơlơi rơkâo hơmâo pô hmư̆ hăng pơpŭ laih anun pơsir tơdah djơ̆ lăp.

“Djru mơnuih ƀôn sang ngă tui hơdră ngă pơar laih anun dŏ ber bơră ruai hrŏm mơnuih ƀôn sang kiăng hmư̆ tơlơi rơkâo, anŏ kiăng, hơdôm tơlơi tơnap tap, dŏ gun lơ̆m gơñu nao ngă hră pơar. Hrŏm hăng anun, ƀing gơmơi tŭ mă hră pơar, pơblang brơi thâo hluh hăng pơsir tơdah djơ̆ găl, tơlơi pơgôp hiăp hiam klă brơi gong gai mă bruă jai hrơi tŭ yua hloh. Hăng anom bruă ngă hră bơwih brơi mơnuih ƀôn sang mơ̆ng kơnuk kơna, gơmơi gir run abih pran jua bơwih brơi kơ mơnuih ƀôn sang klă hloh, sit mơnuih ƀôn sang nao ngă hră pơar”.

Sa thun aka sui mơ̆n, samơ̆ djop laih kiăng ƀuh anŏ pơblih phrâo mơ̆ng tơlơi pơmin git gai jing mă bruă bơwih brơi mơ̆ng gong gai dua gưl. Sit khua jua gong gai prăp lui bưp mơnuih ƀôn sang, đing hmư̆ hăng pơsir đut tơhnal tơlơi kiăng mơ̆ng plơi pla mơtam, gai pơkă kơ anŏ pơblih phrâo ngă hră pơar ƀu kơnong boh tŭ yua kơ bruă mă đôč ôh, dŏ jing tơlơi đăo kơnang hăng tơlơi mơak pran jua mơ̆ng ană plơi pla.