Hăng mrô mơnuih ƀôn sang lu dong tal pă ƀơi rŏng lŏn tơnah hăng lŏn ia prong hloh amăng kual Ngŏ dơnung ASIA, dêh čar Indonesia jing anih sĭ mơdrô prong ƀơi jar kmar, gêh găl biă mă pioh kơ tơring čar Lâm Đồng đing nao pơđĭ kyar.

Tơlơi pơhing lăi pơthâo hăng ƀing ngă bruă mơdrô ba hyu tuai hăng Grup khua mua hyu mă bruă mơ̆ng sang bruă Khua anih jưh pơ ala dêh čar Indonesia, khua mua gah anom bruă Gru grua hăng tuai čuă ngui tơring čar Lâm Đồng brơi thâo, tơring čar hơmâo pok pơhai ngă tui akŏ bruă “Kơtưn bruă ngă hrŏm jar kmar pioh akŏ pơdong hăng pơđĭ kyar Halal Việt Nam truh thun 2030”, pok pơhai kơsem min anih anom kiăng hyu ngui mơ̆ng tuai dêh čar Indonesia kiăng anăp nao man pơdong, tuh pơ alin gơnam sĭ mơdrô bơwih brơi kơ tuai hyu ngui djơ̆ găl anŏ kiăng mơ̆ng ƀing tuai hyu ngui, biă mă đing nao anih kơkuh pơpŭ kơ khul hơmâo tơlơi đăo. Anai lĕ atur yom pioh kơ dua bơnah kơtưn pơtruh nao rai, pok pơhư prong bruă ngă hrŏm hăng pơtrut pơblih nao rai bruă tuai hyu ngui thun blan pơ anăp adih.